Naga Club aser NSF na mangatettep adok

Kohima, Yimpoksüi/November 15 (TYO): 1918 küm tentetba Naga Club Centenary benjungmong dak sendakba nung Naga Club aser Naga Students’ Federation (NSF) na Kohima nung maneni Bodhbar aonunga mangatettep adoka liasü.
Naga Club-i Kohima nung aliba Local ground nung Centenary amongtsü atema renemshia Centenary nüngshilong azüngtsü atema Head Post Office anasa Naga Club building meyong, ta asüba tesem nung kimong ali medemshi.
Tang Naga Club building nung NSF, commercial establishments aser Club family caretaker lidar.
Naga Club-i lemzüktsüba volunteers-i JCB aser tiller-truck amshia kimong nung ali medemshiba mapang nung NSF ketdangpurtem aser Federating units nungi lenirtem iba tesem jagi arua mapa inyakbaji memela.
Ajisüaka mapa inyakertem jagi tesem nung kimongjibosa medemshinüa liasü. Ibayongji telok ana tsüngda obang mapu adoka raratepba mapang nung ano züngsem timba adenshi.
Ajisüaka district administration aser police den SDO aser SP tiyongtsüi aitba ajanga tensaji azüokteta liasü, aser maneni Brihostibarnü o lemteteptsü bangjem.