Naga Council Dimapur-i DC tasenba pelashishia agizük

Dimapur, Aenjeti/January 21 (TYO): Naga Council Dimapur aser Public Action Committee-i achaayanga Dimapur, Deputy Commissioner tasenba Kevekha Kevin Zehol pela agizükba aser coordination senden ka tanü Aenjeti/January 21, 2019 nü Naga Council office Dimapur nung kaogo.
Sentepa aliba lokti den jembidang, Naga Council-i pa pelashishia agizükba atema DC Dimapur-i pelaba metetdaktsü aser administration o Naga Council na longjemer nüburtem ajangzüktsü asoshi maneni inyakyonga aotsü, ta ashi.
Naga nunger lanurtem asoshi tatishitsü sayur tajung kaka akümtsü asoshi Naga council züngsemtem ayongzüba den Kevin-i sorkar mapa nungi anener aliba ketdangsertemi lokti tenzüktsü aoshi tajaba agizüka Naga Council Dimapur nung shilem tajung agiba asoshi parnok tenüng asang.
“Lokti tenzüktsüba ya azü nungi keter arutsüla aser nenok ngua ni kanga nema danga bilemer aser nenok ya bendanga agüja tenzükba sepai kaka lir,” ta pai ashi.
Naga Council tir, Bangerloba Jamir-i, Naga Council ya yimjung aser tesunep bener arutsü aser Naga nunger asoshi parnoki maneni inyakyonga aoba mapang administration den tesendaktep nung aotsü atema 1949 küm tenzük, ta ashi.
Maneni sentong nungsa Public Action Committee Convenor, Vekhosayi-i ashiba agi, lokti ka aintsü asoshi yimjung aser tesunepji tongtibangtiba lir aser PAC-i ochi asoshi maneni inyaktsü. Paisa, district administration nem takokba tashi teyari agütsütsü asoshi nangzük. Naga women Hoho tir, GB union tir, Dimapur urban council nungeria iba senden nung o jembi aser takok tashi parnok teyari agütsütsü nangzük, ta DPRO dimapur sangdong ka ajanga metetdaktsü.