Naga Council Dimapur-i metetdaktsür

Dimapur, September 11 (TYO): September 10, 2019 nü Naga Council Dimapur (NCD) senden ka amendang Dimapur nungi Chumoukedima-i DC office belentsüba magizüker ta maneni bangzüngtepogo.
Tang aliba DC office ya public-i tesem shitak nung lir agizüker aser office belenba ajanga Dimapur nung sensotemi timtem jenti ajurutsü. Talisa, DC Chumoukedima Camp Dimapur ta tenüng tasen ajaba ya magizüker, ta NCD-i tanü sangdong ka nung ashi.
Ano külen, sorkari bill magütsüba atema contractor kati PWD building shibangtsüogo aser PWD ali den ki public dang yokdoktsü ta osang angazüker. Iba onük atema NCD-i department dang tekaratiba nung sen magütsüi aliba agütsütsü ayongzüker aser Chief Secretary-i September 10, 2019 nü tetuyuba agütsüba ama, ozüng alema sorkar meyong department indang ali patta yanglua aliba ajak agientsü akhanger, ta NCD-isa metetdaktsü.