Naga entrepreneur dang tax memeshila: BAN

Dimapur, Mongputeni (October) 6 (TYO): Tawa tu telok kati Naga nunger shishilembar ka dang yearly tax aika meshiba aser pa indang dokan shibangtsüba khukhua aitsür, ta Business Association of Nagas (BAN)-i metetdaktsü.
NNPGs kari Naga entrepreneur dang tax memeshitsü lemtetba atema tenüngsang agütsür. Külem Naga nunger adianu dang tax meshia agibaji majung aser tarutsü Naga entrepreneur tem asoshi tetsükdaktsü ajurutsü ta angatetba atema pelar aser maneni NNPG temi iba tangatetba nung aotsü mepishir, ta BAN-isa ashi.
Talisa Naga entrepreneurs dang nungi tax magitsü ta telemtetba magii aliba NNPGs-i tangar ama telemtetba agitsü aser Naga nunger entrepreneur aser shishilembar dang nung tax mememshitsü ayongzüker, ta parnokisa shisem.
‘Sorkar Ka, Saru Ka’ ta asüba tangatetba nung noktaka lir kechiyong shishilembar dang nungi tax sarujen saruba ajanga timtem ajurur aser kechisarena nung jenjang atutsüsa akümer, ta BAN-isa metetdaktsü.
Naga entrepreneur temi business tila inyaker aser anarongdena tajangzük tera angur. Ajisüaka, NNPG temi tajangzük tera anguba bener aobaji tim masü. BAN ya Naga nunger atema tentetba telok ka lir aser onoki Nagaland ya pei sasa liteta otettba state ka kümdaktsütsü alizüng yur mapa inyaker. Anungji NNPGs-i Naga entrepreneurs aser shishilembartem dang nungi tax kecha mesarutsü mepishir, ta parnokisa ashi.
BAN-isa India sorkar dang yimjung maparen tekaraba nung inyaktsü aser Naga yimten tebilemtsü atema telemtetba ka agitsü ayongzük.