Naga FC 22 buba Classic Cup semifinal-i iogo

Kohima, November 24 (TYO): Naga Football Club (FC) teloki par quarterfinal asaya nung takok ngua, 22 buba Classic Cup football asayamong semifinal asayatsü jenjang ajangzüker telok 3 buba tanü, Brehostibar nü kümogo.
Naga teloki sudden death yimya ajanga MT Youth Club, New Reserve telok madak takok ngua liasü.
Tanü atazüktsüba asaya mapang, minute 95 den extra time, minute 15 tembang tashi nung telok anapronglai goal 1-1 agüja, kasa jenjang ngua asayaba sülen tatem nung Naga teloki sudden death yimya nung MT telok akok.
Tanü asaya mezüngbuba shilem nung telok anapronglai goal agütsütsü meranga kanga junga asaya saka parnoki goal kata magütsüteti süidaktsü.
Tesülen, asaya tanabuba shilem tenzüker mezüngbuba minute nung Akavi Ayemi-i yanglutsüba pass ball agizüka, Blisto-i 1 buba goal agüja, par MT telok temaba jenjang nung ajungkettsü.
Yamaji asayar külen Naga asayar, Taliakum Pongen-i renemtsüba pass ball agizüka, Chaba Huang-i minute 60 buba nung goal meyipja, par telok anaprongla kasa jenjang kümdaktsü.
Asaya mapang tembang tashi nung par telok anaprongla kasa jenjang nung aliba yong takoker shimtsü atema tie-breaker metsütepdaktsü saka telok anapronglai goal 4-4 agüja, maneni kasa jenjang angu.
Tatem nung Naga teloki sudden death yimya agi tanü asayaji koka liasü.
Ano külen, Kuki United FC aser Street Hawks’ FC telok nati asüng, Hokolbar nikongtsütsü 2:00 ako nungi tenzüka, tan asayamong 4 buba aser tatembangba quarterfinal asayatsü renema lir.