Naga FC-i Capt Kenguruse Memorial takok marok agizükogo

Dimapur, November 30 (TYO): Naga Football Club teloki final asaya nung takok ngua 1 buba Captain Kenguruse Memorial Football Tournament asayamong takok marok tanü Hombar nü agizükogo.
Inspector General Assam Rifle (North)-i ayonga asayaba football asayamong final nung Naga teloki goal 3-0 agi Nagaland DGP XI madak takok ngua takok marok aser kulikaket den külemi, senpet sena lakh 1.70 tashi agizüka liasü.
Tanü asaya nung K. Thopi-i asaya tenzüker minute 8 buba aser külem asayar, Taliakum-i minute 44 buba nung goal ka ka agüja par Naga telok goal 2-0 agi temaba jenjang nung ajungkettsü.
Tesülen, asaya tanabuba shilem nung, asaya tenzüker minute 52 buba nung K. Thopi-isa tasembuba aser takokba goal agüja par Naga telok nem takokba bener arutsü.
DGP-XI telokia tanabuba jenjang ngua senpet sen 80,000 agizük aser tan asayamong semifinal nung tamakok ajurur telok, Mokokchung District Football Association (MDFA) aser 164 TA Head Hunter, Naga Regiment naprongla nem senpet sen 50,00 agüja liasü.
Ano, tan asayamong nung shilem agir tanüngba telok 19 shia nem senpet sen 5000 agütsüba osanga jangjaogo.
Tanü asayamong shibangba sentong nung Director General, Assam Rifles, Lt. Gen. HJS Sachdev tongti tesemdanger liasü.
Tan asayamong nung individual shilem nung sempet/senpet agizüker tarensen:
Best player – Khwetelhi Thopi (Naga FC)
Best Goal Keeper – S. Narzary (IGAR (N))
Golden Boot – Rhithso Mero (Naga FC)
Best Defender – Kewillungsubo (Falcon FC)
Play Maker of the Tournament – Sinenlo Kath (Vanguard FC)
Most Promising Player – Arong (MDFA)
Most Valuable Player – Mezhe (DGP XI)
Best All Rounder – Haotinmang (Head Hunters)
Best Referee – Meyieto