Naga flag aser constitution alema aotsüla: Advisor Imkong L Imchen

Kohima, Yimpoksüi/Nov. 07 (TYO): Naga yimten ken o tekeratiba nung tatem kati arutsü asoshi Naga flag aser constitution alema aotsü lenmang lapoka ayutsüla, ta Advisor, Information & Public Relations and Soil & Water Conservation, Imkong L. Imchen-i tanü ashi.

Pai Mokokchung nung October 23 nü jembiba dak sendakba nung NSCN-IM ajanga sangdong ka agütsüba langzüa osangbener den jembidang, tanü tashi Government of India (GoI)-i NSCN-IM den Framework Agreement (FA) zülutepba anema oa mali, ta ashi.

Ajisüaka NSCN-IM ya iba FA nung shilem ka aser kibur asünung, iba ken o jembiba anema par tebilemba lemsatepba aser jembishinü meshidak aser aji melenshitsüla, ta pai ashi.

NSCN-IM-i iba ken o angatettepba menutsü tasa/yimya amshir ta nai ashir asü, ta asüngdang dang, “Tejangjabo memetet/meshitet saka yamaji mesüker,” ta pai langzü.

NECN-IM ajanga flag aser constitution temeja akhangba Centre-i agütsütsü memolungba dak sendakba nung, ken o jembishinüba nung terenlok makai anendaka lira danga lenmang bushitsü merangtsüla, ta pai ashi.

Sorkari agenda danga indang ashidang telangzüba shidak aser tajung agizüktsü renema alitsüla, saka tensa agizüktettsüsa lenmang bushitsü melena parnok (NSCN-IM) ya tali ang tokteper amai lir, ta Advisor Imkong L Imchen-i ashi.

Parnoki iba ken o jembishinüba yimya nung Naga nunger mepelar, ta ashi.

Naga nunger yimten ken o ya 1997 nungi jembi tenzük aser noklangben dak tema jembishinür alitsü südi, saka telemtetba kecha mali aser ibaji ajanga Naga nunger jashir, ta pai ashi.

Naga nungeri joko iba khuret mebenteter, ta ashi.

Prangbong amshiba yimya aliba mechi nüburtem yimtongi madokteter, saka parnoki yakta temai adoktsü.

Flag aser constitution akhangba ya yutsütsüla ta nai angateter asü, ta asüngdang dang, ‘flag aser constitution akhangba ama sorkari magütsütsü ta Union Home Minister Amit Shah-i yimjak nung jangja-jangja shiogo, aser State Assembly nunga metetdaktsüogo, anungji Naga nungeri danga lenmang bushitsüla,’ ta pai langzü.

Flag aser constitution dak alaka danga kishi lapoka lir ta Shah-i aiben sangdonga lir, aser pai jembiba süoki ia agizüktsüla, ta Imchen-i ashi.

“Jembishinü yimya meshidak. Danga lenmangtem lapoka ayutsüla. Solution tekeratiba nung alibaji tajungba ta nüburtem tangatetba tejangja lir,” ta pai ashi.

Naga Political Issue ya A Z Phizo lenisüba kübok 1951 Plebiscite nung ajemdaker Naga nunger arok agenda lir, koba GoI-ia meteta lir, ta ashi.

Nagaland Legislative Assembly nung MLA 60 densema Naga nunger ya shidakba stakeholders lir aser yangji sorkar tenzüker aser Naga nunger nüburtem dena lir aser Chief Minister balala kübok NLA nunga pangzüng balala agizüka lir, ta pai ashi.

Ibaji jurila meyong masü, saka Naga nunger indang lir. Naga nungeri bendanga agütsüba tang tashi Naga nunger molungjang nung lir.

Külem tenzüker, Ministers, Legislators aser dangar temi sentong balala nung jenjang balala nung Naga Political Issue indang jembia arur aser ni kü tangatetba lemsatepba nung tai mali ta bilemer, ta Imchen-i ashi.

Naga nunger tashi temeteter aser nüburtemi media sapang balala nung parnok tebilemba lemsatepa arur.

State Assembly nung züngsem 60 aliba nungi nia ka lir, anungji Naga Political Issue nungya nia stakeholder ka lir, aser parnoka (MLA) nüburtemi shim asünung nüburtemi aginüba ama jembir, ta ashi.

October 23 nü sangdongba nung ni ajang-ajanga nokdaka lir, ta Imchen-isa ashi.