Naga framework agreement ajanga tanga NE state tem mekongshir: Rijiju

Guwahati, August 7 (Agencies): Indo-Naga yimjung olemtep asoshi telemtetba ka agitsü atema India sorkari mapa inyaker saka parnoki August 3, 2015 nü GoI aser NSCN (IM) tsüngda framework agreement sign asüba indang osangtem yimjak nung memetdaktsür.
Tawa tu Rajya Sabha nung Union minister of state for Home Affairs, Kiren Rijiju-i tezüluba ka nung iba onük atema telemtetba ka agitsü atema mapa inyakdar ta metetdaktsü.
Assam nungi Congress MP, Ripun Bora-i asüngdangba atema Rijiju-i iba telangzüba agüja liasü.
Ajisüaka, Rijiju-i framework agreement nung aliba onüktem yimjak nung metetdaktsütsü memulung aser pai ashiba agi, “iba osang metetdaktsüba ajanga tatembang telemtetba agiba nung tetsükdaktsü ajurutsü akok.”
Nagaland nung teti atema yimjung bener arutsü atema tanga north east state tem den framework agreement nung aliba onüktem jembitsü nüngdak madoker, kechiyong framework agreement nung parnok kongshia mali, ta Rijiju-isa metetdaktsü.
NSCN (IM)-i akhangba greater Nagalim nung Assam, Arunachal Pradesh aser Manipur kübok litsütem ka akümtsü onük densema lir, ta paisa shisem.
“India sorkar aser NSCN (IM) tsüngda framework agreement agiba atema tanga state sorkartem den jembitsü nüngdak madoker, kechiyong iba framework agreement ajanga parnok state tem mekongshir. NSCN (IM)-i akhangba onüktem rongnung Naga nunger litsütem külemi ka akümtsüba indang dena lir” ta Rijiju-isa ashi.
Bora ya taoba mapang Assam nung minister ka liasü aser tang pai Assam Pradesh Congress Committee (APCC) tir inyaker aser pai framework agreement indang tasüngdangba pungu asüngdang.
Centre-i Assam dena tanga north-east state tem nungi framework agreement indang osang miimbanga ayur aser iba nung NSCN (IM)-i akhangba Naga nunger aliba tesemtem ka akümtsüba dena lir, ta Bora-i metetdaktsü.
Nagaland den kidanger state temi framework agreement tejangja metetnüa lir aser iba ajanga tanga state tem nung kongshitsüsa tensa ajururua Assam nung opposition Congress-i iba inyakyim anema nokdaktsü, ta Bora-isa ashi.