Naga Heritage Village ozüng agi alenbanger

Dimapur, September 4 (TYO): Kisama, Naga Heritage Village atema ali tenlartemi tenokdangba kar agütsüogo.
July 30, 2019 nü ali tenlaba yimtsüng ana nungi lokti tentet 6- Kigwema Women Society KWS, Phesama Women Society (PWS), Kigwema Youth Organisation (KYO), Phesama Youth Organisation (PYO), Kigwema Students’ Union (KSU) aser Phesama Students’ Union (PSU) senden ka amendang telemtetba kar agia liasü, ta Joint Action Committee sangdong ka nung metetdaktsü.
Heritage Village timtema ayutsü meranga aruaka nisung asüba, telok o telok raratepba, ozüngi memelaba mapa inyakba, auyaba, kiojen raksatsüba tatalokbatem ataloka arur aser iba jagi Village Council tem nungi temelaba agir, lokti tentet 6-i aibelenertem merenshitsü atema telemtetba agiogo, ta parnokisa ashi.
Parnoki telemtetba agibatemji Kisama, Naga Heritage Village nung (i) IMFL aser tanga ozüng alema achiba mozütem meyokdaktsütsü/noktanger, (ii) kija/telok tsüngda rara adokdaktsürtem merenshitsü, (iii) public kiojentem raksatsür mesüra auyartem merenshitsü, (iv) Gari rallying/racing asürtem merenshitsü aser (v) yimjak nung yimya/inyakyim tamajung benshirtem aser menentsürtem merenshitsü.
Heritage Village nung sen aika endokogo aser ano küm shia sorkari anogo 10 nü benjung atema sen aika endoker. Anungji, Tourism Department dang Heritage Village timi anepalutsü ayongzüker, ta Joint Action Committee-isa ashi.
Benjung amungba sülen sorkari tesem odang yutsür aser manüker, iba jagi kümtem süia arudang Heritage Village ya mapa tamajung aser ozüng alema inyakba tesem ka kümdaktsüogo, ta parnokisa shisem.