Naga Hoho aser ENPO-i CM TR Zeliang agizük

Dimapur, April 28 (TYO): Tanü April 28, 2016 nü Nagaland Chief Minister, T.R Zeliang Bali, Indonesia nungi  Dimapur Airport atonga arudang Naga Hoho aser ENPO nati sentong ka ayongzüka pa agizükogo.
April 23, 2016 nü Bali, Indonesia nung 6buba Global Leadership Award sentong nung CM-i Lifetime Achievement Award agizüka liasü, aser tanü pai adenshia alirtem dang, “Ni iba award ya Nagaland nüburtem den lemsateper,” ta ashi.
Chief Minister-isa ashiba agi, iba Award agizüktsü atema Bali nungi metetdaktsüdang alimar akhümket sempet ka agizüktsüsa komaser pa temsüa liasü ta pa melugnjang nung tasüngdangbatem liasü.
Linük tulu India den medemdangra Nagaland state ya kanga tila ajisüaka pa shimba atema süngmanger, ta pai ashi.
Global Leadership Award sentong nung telemsa balala nung awards agütsü, ajisüaka Lifetime Achievement Award bo nisung asem nem dang agütsü, pa den American Professor ka aser  Indonesia Parliament Speaker liasü, ta Zeliang-i ashi.
Chief minister Zeliang-i ashiba agi, pa Bali airport tonger pai iba award atema pa shimba kulitem asüngdangdang, pa dang ashiba kulitemji- tensa tamajung balala ajangshiba state nung lenir ka asüba ajanga, state Assembly nung tashi sayutepdang pai vote 100 %  anguba aser democracy linük ka nung tang mezüng Nagaland sorkar nung opposition maliba kulitem ajanga liasü ta pa nem metetdaktsü.
Iba dak sentakba nung pai, “Ni alima matsüngdang nümatanga nokdak. Iba ya nüburtem ajanga lir, aser iba ya nüburtemi nungitba ajanga lir,” ta ashi.
Naga Hoho Tir, Chuba Ozukum-ia, CM nem alima akhümket sempet agütsübaji Naga nunger lokti ajak atema konang lir ta ashi. “Iba yongji asen lenir nem tenüngsang agüja pa agizüktsü atema Naga Hoho aser ENPO nati iba sentong ayongzük,” ta ashi.
Iba sentong nungsa NMA Advisor, Rose Mary-ia NMA aser Naga tsürtem tenüng nung T.R Zeliang nem tenüngsang agütsü.
Tanü Dimapur Airport nung TR Zeliang agizükba sentong nung MLA tem, Parliamentary Secretary tem, Lokti tentettem, melungtet teloktem aser melungteter noklang aika adenshia shia.