Naga Hoho aser Konyak Union temi CM den ajurutep

Dimapur, August 23 (TYO): Naga Hoho tir Chuba Ozukum-i anir züngsem 7 teshimtet telok ka den tanü sensaksemdang Chief Minister, TR Zeliang-i, “mekoktetba khuret kecha mali aser asenoki public taginüba aser tebilembatem asüngdanga mapa inyaktsüla” ta ashi.
Naga Hoho teshimtet telok jagi tanü Nagaland Civil Secretariat nung Chief Minister den ajurutep, ta Media Cell, CMO Nagaland sangdong ka nung metetdaktsü.
Iba mapang Naga Hoho teloki Chief Minister den pa iba menden inyaktsü shimba atema tenüngsang agütsü aser sabang ka kübok Naga Civil Societies ajak külemi longjemdaktsütsü asoshi mapa inyakang, ta ayongzük.
Naga yimten tebilemtsü atema tatembang telemtetba ka magidang Naga Yimten Telok ajak anioktsüla. 2018 Elections nung teyari angutsü atema dang Naga yimjung olemtep maparen meinyaktsüla, saka nendaknendaka iba mapa inyaktsüla, ta TR Zeliang-i ashi.
Naga nunger shia pei li nung sadoksadoka yimjung nung alitsü atema tekaratiba nung telemtetba ka agitsüla, ta paisa shisem.
Tanü anogo nungsa, Konyak Union tir, Manlip Konyak aser tongti tezülur Honang M. Konyak nati anir KU teshimtet telok kati Chief Minister den ajurutep.
KU pur den Rural Development Minister, EE Panteang dena liasü aser parnoki TR Zeliang nem Konyak ‘Nyam’ sempet agütsü.
Parnok aliba tesem nung tzünglu kanga aruba aser tzümetsüng ajanga timtem bener aruja aliba asoshi rongdak teyari agütsütsüla ta KU teshimtet teloki Chief Minister den lemsatep, ta Media Cell, CMO sangdong nungsa metetdaktsü.