Naga Hoho aser NPO Myanmar senden amen

Kohima, July 4 (TYO) : Naga nunger ajak külemi longjemtsü aser külem nükjidong aser tangatetba lemsateptsü atema Hombarnü Naga Hoho aser Myanmar nung Naga nunger tongti telok, Naga Public Organization (NPO) tsüngda senden ka amen.
Hotel Japfu, Kohima nung amenba senden nung Naga Hoho aser Naga Public Organization (NPO) züngsemtemi kanga junga shisa lemsatepba sülen Naga nunger aliba tesem ajak nung angatettepa alitsü atema taküm küm tatemlen senden tuluba ka ayongzüka amentsü telemtetba agi.
Iba senden nungji Naga Hoho aser Assam, Arunachal, Nagaland & Manipur nung NH unit tem, Naga Public Organisation (NPO) den Myanmar nung Naga nunger yimsüsürtem aser Naga civil societies aser wadang balala nung lennirtem adentsü.
Myanmar nungi aruba Naga nunger telokji NPO Chairman, Harti Yang Li aser Naga Student’s Organization General Secretary, Mankhat Konyak na lenisüba kübok liasü aser Tir, Chuba Ozukum aser Tongti tezülur Mutsikhoyo Yhobu nati anir Naga Hoho züngsemtem aden.