Naga Hoho & ENPO-i sorkar nem anogo züngzüktsür

Dimapur, December 10 (TYO) : Naga Hoho aser Eastern Nagaland People’s Organization nati anir Nagaland nung alirtemi Nagaland Municipal Act 2001 onük kanga junga shisadanga jembiba sülen state sorkar dang anogo 15 tsüngda September 22, 2012 Assembly telemtetba meyipa agitsü takhangba agütsüogo.
Naga Hoho President, P. Chuba Ozukum aser ENPO President, Khoiwang Konyak nati Nagaland Chief Minister dangi züluba shidi nung iba takhangba agütsü.
NH aser ENPO nati külem lisopur teloktem den sensaksema aser sendentem amenba sülen state sorkar nem tatembang takhangba agütsütsü lemtet aser takhangbatem rongnung, September 22, 2012 telemtetba meyipa agitsü, election agitsü osang mesangdongtsü aser Joint Action Committee on Women Reservation-i PIL benokba meyipa agitsübatem lir, ta Naga Hoho aser ENPO shidi nung shia lir.
“Sorkari tanü nungi tenzüker, anogo 15 tsüngda special session ka jazüka September 22, 2012 Assembly Resolution tanaben meyipa magira, Naga Hoho aser ENPO nati sorkar anema mapa inyaktsüsa akümtsü, aser iba tebilemtsüji nür sorkari abentsü” ta P. Chuba Ozukum aser Khoiwang Konyak nati Chief Minister dang i züluba shidi nung shia lir.