Naga Hoho-i AFSPA agientsü akhanger

Dimapur, July 11 (TYO) : India sorkari maneni Nagaland nung June 30, 2014 nungi tenzüka küm ka atema Armed Forces Special Powers Act (AFSPA) alitsü ozüng agütsüogo.

Iba ozüng tesashi ajanga sepaitemi injang kahdoktsü mesüra tashiyim amshia inyaktsü tashi agütsür. Iba ozüng ajanga sepaitemi nisung tepsettsü akok aser iba anema okadak ken o benoka jembitsü makok. Shia metetertem aliba lokti aser tanü-asüng putu nung iba ama ozüng ayutsü nüngdak madoker aser India sorkari Naga nunger madak iba ozüng alitsü lemtetba aitsür, ta Naga Hoho tongti tezülur, Mutiskhoyo Yhobuh-i sangdong ka nung metetdaktsü.

Naga Hoho-i aiben India sorkar dang iba ozüng agientsü atema mepishia arur aser tanga Nagaland nungi AFSPA agientsü takhangba agütsür, ta sangdong nungsa shia lir.