Naga Hoho-i Angh & C.M dang Khristmas tiptema amungtsü atema inyaktsü tuyur

Dimapur, December 20 (TYO) : India Linük Temzüng kübok nübortem nem temeten balala agüja aliba nung ajemdaker, Naga Hoho-i Nagaland Angh aser Chief Minister dang alima nung Khristan tamangertem den külemi, sorkar mapa inyakertema Khristmas tiptema amungtsü atema telemtetba agiang aser tetuyuba agüjang ta metetdaktsüogo.
December 25 nü Good Governance Day amungba magizüker ta kijatem, Christian institutions aser civil organization temi tebilemba aika metetdaktsüogo. Nübortemi tejashi metetdaktsüba sülen, Nagaland sorkari India Prime Minister dangi iba onük atema züluogo aser iba atema Nagaland Chief Minister dang pelar, ta Naga Hoho sangdong ka nung metetdaktsü.
Alima nung democracy tulutibatem rongnung India linük dena lir aser iba linük ya tamangba yimsü talenba melii tentet. Iba tangatetba nung ajemdaker India Linük Temzüng yanglurtemi iba indang jangjajangja shia lir, ta Naga Hoho General Secretary Mutsikhoyo Yhobu aser President, P. Chuba Ozukum nati sangdong nung shia lir.
Nagaland nung Khristan tamanger 90.02% lir aser sorkar mapa inyakertem dena Naga nungertemi küm piyong renema arur Khristmas amunger. Anungji, India sorkari December 25 nü Good governance day amungtsü lemtetbaji Linük Temzüng anema inyakba mapa ka lir aser iba telemtetba ya Khristan purtem, talisa Nagaland nung alirtem atema mebilemtsüi inyakba kuli sayur, ta Naga Hoho mendenpurtemisa ashi.
Naga Hoho teshimtet telok kati November 29, 2016 nü Union Minister of State for Home Kiren Rijiju den December 25 nü Good governance day amungtsü sangdongba onük benoka lemsatepogo aser idangji pa dang North East nung alirtem tenüng nung iba onük India sorkar dangi abentsü mepishia liasü, ta Naga Hoho-isa metetdaktsü.