Naga Hoho-i Assam CM den ajurutep

Dimapur, July 24 (TYO): July 22, 2016 nü Tir, P.Chuba Ozukum-i anir Naga Hoho nungi teshimtet telok kati Assam Chief Minister, Sabarnanda Sonowal den Brahmaputra State Guest House, Guwahati nung ajurutepa senden amen, ta Naga Hoho, Secretary (Adm), Chitho Nyuso-i sangdong ka nung metetdaktsü.
Iba mapang Naga Hoho-i Sonowal dang Naga-Assam coordination Forum tentetba aser iba telok indang alizüngtem metetdaktsü.
Naga-Assam coordination Forum ya state ana tsüngda tesentaktep tajungba akümtsü aser tali angatetteptsü atema tenzük, ta Naga Hoho-i Assam Chief Minister dang ashi.
Naga Hoho-isa yimten olemtep agiba aser Nagaland nung yimten tensa indang osang lemsatep. Indo-Naga yimten tebilemtsü atema telatetba ka bener arutsü atema inyakba mapa nung Assam-i yariteptsü ayongzük, ta Chitho-isa sangdong nung shia lir.
North-east nung ozüng alema bendangertem aruba khuret benoka jembidang, Naga Hoho-i Assam aser Nagaland nungi ozüng alema arurtem anientsü atema külemi yaritepa mapa inyaktsü ayongzük.
Assam aser Nagaland tsüngda mapang talangka arrtsü mangatettep aliba ya state anaprong nungi yimten telemtetba ajanga dang bentettsü, ta Naga Hoho-i Sonowal den lemsatep.
Assam nung aliba Naga nunger atema jembidang, Naga Hoho-isa Chief Minster dang NC Hills aser Rengma Hills nung rongsenren aser infrastructure tsütsü terenlok mapa inyaktsü aser connectivity o human resource development maparen inyaktsü atema mepishia metetdaktsü, ta Naga Hoho, Secretary (Adm)-isa metetdaktsü.