Naga Hoho-i ayongzüker

Dimapur, October 23 (TYO): Naga nungeri yimjung aginüa bushiba aser tangar den kasa ama linüa mapa inyaktsü tenzüker mapang talang ka arur, ta Naga Hoho-i metetdaktsü.
Naga nüjiso atema rarartemi taküm bendanga agütsübaji asen putiotsü ajanga ashir aser tesüiba mapang nisung karibo Naga nunger ashiokja timtem jenti bentsür aruja liasü, ta Media Cell, Naga Hoho-i sangdong ka nung ashi.
Timtem-tuoshi, reshikangshi, tashiyim agi shi nung medemba aser taküm samatsüaka Naga nüjiso atema rarartemi iba mapa manendaktsüi dang arur aser iba ajanga asenok tetsübu mesüra terata kecha melii talenba maliba nübortem ta asüba temeten angur, ta parnokisa ashi.
Tanü Naga nungertemi asen tarutsü tia shimtsü aser lemtettsü asoshi mapang ka ajurua lir. Asenoki aginüba atongtsü atema telongjem nüngdaker aser ibaji asenok kija tangatetbatem yutsü nunga ataloktsü, ta Naga Hoho-i ashi.
India sorkari tatembang telemtetba agiba nung telok ajak dendaktsütsüla aser khen atema tenangzüktep agiba ajanga Naga nunger tsüngda telemsa madokdaktsütsüla, ta parnokisa metetdaktsü.
Naga nungertem aser talisa Naga nüjiso bushir ajak dang mangatettep toktsütsü aser asen lima nung yimjung aser tesünep bener arutsü atem longjemtsü ayongzüker, ta Naga Hoho-isa ashi.