Naga Hoho-i General A .Maken mang ayimer

Dimapur, May 30 (TYO) : Nisung ajaki meteta aliba Naga nüjiso atema rarar aser taoba Naga Summit/Naga Hoho President, General A. Maken May 30, 2016 nü iba akümli toktsür aoba osang angashia temulung raksar, ta Naga Hoho sangdong ka nung metetdaktsü.
General A. Maken ya Naga linük meimer nisung ka liasü aser pai Naga nüjiso atema rara nung shilem tulu agia aruogo. 1954 nung pai Naga National movement nung shilem agitsü tenzük aser jenjang balala nung mapa inyaka aruba sülen, India sorkar aser Naga nunger tsüngda ceasefire tenangzüktep agiba tashi pai kanga meranga inyak aser iba sülena pai maneni Naga nüjiso atema inyak, ta Naga Hoho Tir, P. Chuba Ozukum-i sangdong nung shia lir.
Naga Hoho-i linük atema bendanga agüja inyaker General A. Maken nem tetushi agütsür aser Naga Hoho tenzükba nung pai tongti shilem agiba atema tenüngsang agütsür. 1997 küm Naga Summit mapang pa Convenor liasü aser 1998 küm Naga Summit nungi Naga Hoho ta tenüng melen. 1998 küm pa Action Committee Chairman ka ama pa lenisüba nung Naga Hoho aser tanga mulungtet teloktemi Indo-Naga yimten ken o atema ‘Solution not election’ ta ser mapa tajung inyakba bilemteter. Pai yimjung aser nüjiso atema mapa tajung inyakba teti bilemtettsü, ta Naga Hoho Tir-isa metetdaktsü.
General A.Maken asübaji par kibong, Naga nungertem aser nüjiso meimertem ajak atema takoksa ulura lir. Tanü pai iba lima toktsür oaka, pai inyakba mapa aser tesayubatem kodanga mamatsü aser maneni item ajanga loktiliba ajungmesotsü, ta P. Chuba Ozukum-isa sangdong nung shia lir.