Naga Hoho-i June 7 nü Assam Rifles-i inyakba aitsür

Dimapur, June 9 (TYO) : June 7, 2015 nü Old MLA Hostel junction, Kohima nung Assam Rifles-iNaga nunger lanur pungu pur züka merenshiba atema kanga sasa bilemer aser kukua aitsür, ta Naga Hoho-I metetdaktsüogo.
Naga nunger lanurtem dak temulungmelemi aputsü aser tai maketertem reshikangshiba ajanga nenok New Delhi nung sempet mangutsü, ta Secretary Administration, Naga Hoho, Chitho Nyusou-i sangdong ka ajanga metetdaktsüogo.
Tai maketba lanurtem pua merenshiba sülen timi meinyak aser aibelena apuba ta osang sangdongba ajanga Assam Rifle aser Naga nungertem sabang ka nung kodanga külemi melongjemtettsü. Anungji ketdangsertemi ya ser tansütsü asütsü atema ozüng anema inyakba ketdangser aser jawan tem merenshitsüla, ta Naga Hoho-isa takhangba agütsüogo.
Naga Hills nung mapa lemzükja aliba security force temji nübortem kümzüktsü aser lendong nungi jenbua lidaktsütsü atema lir ta Naga Hoho-i bilemer anungji security force temi aibelena inyaksangshibatem metongshitsüla aser yimyatsüya tajungtiba nung nübor tenzükba mapa inyaktsüla, ta parnokisa shiogo.
Merangkong yimer Imlisunep aser Limatoshi aser Mongsenyimti yimer Supongwati nunger amala lanur entrepreneur tem Kohima tiyongtsü nung apuba aser ano Khutsami yim nungi kaketshir lennirtem Mudotuzo o Vetasho nungertemdak temulung melemi bilema atema pua merenshibaji Human Rights anema inyaksangshiba lir. Anungji National Human Rights Commission-i iba tatalokba süoki ia bilema Assam Rifles anemamapa inyaktsüla, ta Naga Hoho-isa takhangba agütsü.
Naga Hoho tir, P. Chuba Ozukum lenisüba Naga Hoho telok kati June 9, 2015 nü New Delhi nung interlocutor R.N. Ravi den ajurutepa June 7 nü Kohima nung atalokba osang aser Chandel district nung Naga nunger yimdaklirtem tetsübu nung pei talidak toktsür jena aoba osangtem metetdaktsüogo aser pai item onük atema inyaktsü ta R.N. Ravi-i Naga Hoho dang nangzük, ta SecretaryAdministration, Naga Hoho-isa sangdong ajanga metetdaktsüogo.