Naga Hoho-i Kiyanilie asüba mangyimer

Kohima, Sept. 28 (TYO): Nüngtugu Naga lenir, MLA aser taoba mapang Speaker aser Minister, Kiyanilie Peseyie anojungi September 27, 2017 nü alima nungi pilaba osang angashia Naga Hoho-i mangyimer, ta Brihostibarnü Naga Hoho Tir, P Chuba Ozukum-i sangdong ka nung metetdaktsü.
Naga Hoho-isa, asür Kiyanilie ya ajemaluba nisung aser Tsüngrem tsübuba nisung ka liasü; pai sorkar tenzükba mapang aser yimtenren tenzükba mapang ochishia inyakogo, ta metetdaktsü.
“Tang ama yimtenren nung tsüngrarusa mapang nung pai yimtenren lenir ka ama tatishitsü tajung sayuogo, aser ibaji lanurtemi angazüktsüla. Pa asüba ya Angami nunger aser 8th Western Angami Assembly constituency atema dang masü saka Naga nunger ajak atema takoksa lir,” ta Naga Hoho-i metetdaktsü.
“Naga Hoho-i mangyimer kibong den mangyim lemsateper, aser Tsüngremi iba ama mangyim mapang parnok nem tesünep agüjang aser asür tanela tesünep nung anisüngzükdakjang ta sarasademtsür,” ta kasa sangdong nungsa shia lir.