Naga Hoho-i Pangsha tatalokba aitsür

Dimapur, August 29 (TYO): Tanü Naga Hoho General Secretary, Mutsikhoyo Yhobu-i sangdong ka ajanga, Naga Hoho-i aiben sepaitem dang operation inyakba mapang kanga azüoktsü asoshi mepishia aruogo, ajisüaka onoki mepishibaji parnoki mangashi ama kümdaktsür, ta aitsüogo.
Ano kanga tebangkatsüka aser temenünütsükaji Pangsha nung Assam Rifles (AR) sepaitemi tai maket nüburtem tepsetba aser yirutsüba sülen parnoki maneni “kahtepba mapang Over Ground Workers (OGWs) tem meyirutsütsü asoshi parnoki kanga tazüokba nung raraogo” ta jembiba lir ta Naga Hoho-isa sangdong ajanga aitsü.
Assam Rifles-i meimchir temeten anema taochi melii inyaker ta parnok (AR) sangdongji ajanga sayur. Taochi meketi nüburtem tepsetba aser yirutsüba aitsüba den külemi iba tatalokba tejangja bushisüngdangtsü aser tekaraba nung aibelenertem merenshitsü asoshi onoki ketdangsertem dang mepishir. Iba den külemi onoki tamalen mepishiba ama lepshia operation inyakdang Assam Rifles-i kanga tazüokba alitsü aser joko tensa meraksatsütsü mepishir, ta Naga Hohoi-sa sangdong ajanga metetdaktsü.