Dimapur, February 23 (TYO) : February 18 & 19, 2016 nung Naga Hoho nungi teshimtet telok kati Kiphire, Pungro aser Shamator semdangba sülen parnoki Sangtam aser Yimchungrii nunger dang kati ka anema mapa meinyaktsü mepishia metetdaktsüogo.
Naga Hoho tenüng nung Vice President, H.K. Zhimomi, Speaker Medoselhuo Keretsii Finance Secretary Ruungutuo Sechii aser Secretary Aministration Chitho Nyusou nungertemi tensa mejungi aliba tesemtem semdanga liasü.
February 6, 2016 nü asür Alemba aser asür Naro tepsetba aser Kiphire nung kiojen aser kechisarena aika rasaktsüba inyakyim kukua aitsür aser state sorkari iba dak sendakba nung bushisüngdangba maparen tekaratiba nung inyaktsü aser Pungro nung pei talidak toktsür aotsüsa akümer nem teyari agütsütsü ajungmesor, ta Naga Hoho-i sangdong ka nung metetdaktsü.
February 6 nü atalokba lendongji kin o kin tsüngda onük mekümdaktsütsüla kechiyong Naga nungertemi nisung tepsettetba magizüker. Adianu ana tsüngda mapang talangka mangatettep onük aliba khuret süa abener aser iba asoshi sorkari teti atema telemtetba tajung ka agitsü mapang tongogo, ta sangdong nungsa shia lir.
Nagaland nung bushisüngdangba teloktemi süoki ia mebilemi aser zübazüba mapa inyakba angudang Naga Hoho kanga aoksar. Naga yimten teloktem, ozüng alema mapa inyakba teloktem mesüra sepaitemi nisung tepsetba ajak Naga Hoho-i aitsür aser sensosanger ajak dang ozüng alema nisung tepsetba mapa meinyaktsü mepishir, ta Naga Hoho-isa sangdong nung shia lir.
Asür Ritika Mehta, asür Charlie Hangshing aser asür Alemba o asür Naro nungertem tepsetba tatalokba bushisüngdangertemi tali nendaka mapa inyaktsü aser tekaratiba nung takoksa angur nem temeten agütsütsü mepishir, ta Naga Hoho-isa metetdaktsü.
You must be logged in to post a comment Login