Naga Hoho longjema alitsü ayongzüker

Dimapur, August 30 (TYO) : Naga Hoho nung lenirtem rongnung meputepi aliba yaktasa mapang tajung ka nung jembitepa tangatettep kati arutsü imlar ta Naga Hoho nung tir Wb.P.Chuba Ozüküm aser tadong tir Wb. H.K.Zhimomi nati metetdaktsüogo.
Tawa Luroi/August 23 nü Senapati nung Naga yimten dak aketba ken o ka Naga Hoho aser United Naga Council nati metetdaktsüba maparen nung, Naga Hoho nung lenir kari iba ken o ji telok den masüngdangtepi tiri pai mulungba nung inyak ta aija metetdaktsüba ken o ka jangjashitsü dang, ” iba ken o ji tir kisungi masü saka Naga hoho tadong tir H.K Zhimomi, aser Samson Remei na den K.Elu Ndang, Assembly Secretary aser Mhonchumo Lotha, Cultural & Customary Affairs Secretary nungertem ajak lia renemba ken o ka liasü,” ta Naga Hoho tirisa metetdaktsü.
Luroi/August 23 nü Naga Hoho aser UNC nati metetdaktsüba ken o nung Naga yimten telemtetba ken o menentsüsa shingaia meinyaktsüla ta shia lir.
Joko, Naga Hoho nung tang teinyakdak ketdangpurtem kümsük küm tembangtsü ita anasemka dang alinungji, ajaki tangatettep kati arua külemi longjemer ketdangpur tasen shima odaktsütsübajiang süokia bilema inyakdi, ta Naga Hoho lenirtemisa metetdaktsüogo.