Naga Hoho, NSF & NPCC-i Wuhu tatalokba aitsür

Dimapur, July 17 (TYO) : Phek district kübok India nunger sepaitemi tai maketba kaketshir ana khasetba aser tetsür ka yirutsüba kukua aitsür, ta Naga Hoho-i sangdong ka ajanga metetdaktsüogo.
“Sepaitemi lisopur sobaliba aser yimyatsüyatem magizükba ajanga iba lendong atalok” ta Naga Hoho general secretary-i sangdong ka nung shia lir.
Naga Hoho-i iba tatalokba nung tasür kibongtem den asüku lemsar aser tai maketba taküm lalutsürtem puteter tapet temerenshi agüjang ta Nagaland state sorkar nem takhangba agütsür, ta sangdong nungsa shia lir.
Sepaitemi Naga nunger sobaliba aser yimyatsüya akhümtsübutsü tetuyuba agütsür aser iba anema inyakra yimjung tensa ya raksatsü akok. Civilian dak tashiyim inyakba ajanga masü saka tazüokba lia inyaksangshiba ajanga dang nübortemi mulung alemtsü. Tang nungi law & order tenüng amer civilian taküm ka danga melaludaktsütsü mepishir, ta Naga Hoho-isa metetdaktsü.
Ano maneni, Naga lima nung yimjung bener arutsü atema India sorkar aser NSCN(K) tsüngda ceasefire tenzükshitsü mepishir, ta Naga Hoho-isa nenshia metetdaktsüogo.
Naga Students’ Federation (NSF)-ia sangdong ka ajanga Phor yimer Tuzali (14) aser Wuzu yimtsür Aso (13) na khasetba den Esther Vitsurho yirutsüba kukua aitsüogo.
Tasür kaketshir anaji Pholary Government High School, Phor nung tezüngdak liasü aser iba tatalokba ya India nunger sepaitemi Naga nunger anema inyakba lir, ta NSF tir, Subenthung Kithan aser tongti tezülur, Boveio Poukai Duo nati külem sangdong ajanga metetdaktsü.
Yashi atalokba ajanga India nunger sepaitemi tim masü inyaksangshiba jungkai adoka sayur aser AFSPA ozüng amer tai maket sensotem dak kuli kecha melii teka sangshiba sayur, ta NSF sangdong nung shia lir.
Kaketshir anaprong dak tekolak nung injang agi akha aser yirua aliba tetsür dak teka nung akha. Iba ya ajanga India sepaitemi blank firing ta ashiba aitsür aser tai maketba civilian metetsümonga khasetba sayur, ta NSF-isa ashi.
Naga nunger ajaki iba Armed Forces Special Power Act (AFSPA) aitsütsü ayongzüker aser iba ozüng ya meshimeshia agientsü akhanger, ta NSF-isa metetdaktsü.
Honibar anüngdang 12:00 ako nungi Seniors Consultative Meeting den Federating Units o Subordinate bodies senden nung züngsem ajak arua adentsü mepishir, ta NSF mendenpurtemisa shisem.
Ano, NPCC tir, K Therie-ia sangdong ka ajanga iba tatalokba kukua aitsüogo.
Sen agi nisung taküm malizükteter saka Nagaland state sorkari tasür kaketshir kibong shia nem sen lakh 10,00,000 aser teyirur nem teyari agüjang ta onoki takhangba agütsür, ta K Therie-i sangdong ajanga metetdaktsü.
India nunger sepaitemi parnok taküm aser kiojentem lendong nungi kümzüka ayutsü ta public-i imlaa aliba mapang ka nung iba inyakyim ajanga public temulung ilaa kümdaktsüogo, ta paisa shisem.
Ceasefire meyipa reprangshimtsü aser Naga yimten telok ajak den olemtep alitsü onoki ayongzüker. Nüngdak dang süra, NPCC-i Naga yimten ken o khuret koktettsü atema tiyong nung ia inyaktsü renema lir, ta K Therie-isa ashi.