Naga Hoho nungi Sumi ketdangpurtem anitetter

Dimapur, September 11 (TYO): Tawa Central Nagaland Tribes Council (CNTC) nung dena aliba kin asem Sumi, Lotha aser Ao kintem Naga Hoho nungi atsüngina atatsü telemtetba agiba sülen, Sumi Hohoi Naga Hoho nung shilem agitsü yoka aliba Sumi nunger ajak jatetogo.
Sumi Hoho ya CNTC nung züngsem lir, anungji CNTC-i Naga Hoho nung medeni alitsü asoshi telemtetba agiba nungji Sumi Hoho-a adener aser Sumi Hoho nungi yoka aliba Naga Hoho nung Sumi nunger ketdangpurtem ajak anitetter ta parnok sangdong ka ajanga metetdaktsüogo.
CNTC teloki Naga Hoho dang tamalen Nagaland state nung Rongmei nunger kin ka asütsü langa lir ta kuli agüja alibaji anogo 30 nü tsüngda  meyipa agiadoktsüla ta takkangba agüja liasü, ajisüaka Naga Hohoi parnoki akhangbaji mataloktsüba agi anogo 30 nü agütsüba mapang tonger taoba August 31, 2016 nü Naga Hoho nungi atsüngina atatsü CNTC-i telemtetba agia liasü.
Sumi Hoho sangdong nungsa ashiba agi, CNTC ya 2012 küm December 8 nü Ao Senden, Lotha Hoho aser Sumi Hoho kin asem telongjem temelaba  nung aküm aser iba sülen March 12, 2016 nü state level nung iba kasa telongjem tentet.
Iba sülen July 22, 2016 anogo nung Khehokhu yimtak CNTC senden lia Nagaland nung Rongmei nunger nem kin ka jenjang agütsüba onük benoka jembi aser iba kasa senden nung Naga Hoho dang parnoki September 22, 2008 anogo nung Nagaland state government nem Rongmei nunger nem kin ka jenjang agütsütsü junger ta kuli agüja alibaji meyipa agitsü asoshi takhangba agütsütsü lemtet, ta Sumi Hohoisa metetdaktsü.
Ajisüaka, Naga Hohoi iba takhangbaji mataloktsü nungji, CNTC senden ka August 24, 2016 nü lia lemtetba ama, Naga Hoho nungi CNTC nung dena aliba kin asem atsünginogo ta parnokisa metetdaktsü.