Naga Hoho timtem tia

Naga nunger ajak ajangzüktsüsa Naga Hoho ama Naga nunger telongjem tentet ya tashi taitba aser tajungba aotsü melen tang amai tashi maitba maitba aoba angudang tezüdanga bilemer. Atangji, Naga Hoho ya tenzükdangbo Nagaland nung alir Naga nunger kintem telongjem dang asütsü ta ser tenzük südi, saka Nagaland nung alirtem dang mesüi Naga nunger tanga state kübok alirtema dena dendaktsü tajungba ta bilemba agi Manipur nung alir Naga nungertema dena dendaktsü südi. Atangji, kong lidir liaka Naga nunger, iba jagi Nagaland akümdanga kasa onükji leplalepshia jembir külen, kenübo Naga nunger lushi tangtepa aliba ajak ya yimten yimsüsüba ka kübok alitsü ta lemteta yur külenang Nagaland mesemtet.  Aji oda, Nagaland nung alirtem dang masü saka Naga nunger aliba state ajak nungi arua Naga Hoho ama nung shilem agitsübaji junger aser tim dang liasü. Ajisüaka, Naga nunger asoshi timtem kaji asenoki tang Nagaland den tangtepa aliba Naga nunger lushi ajak nungi Naga kin ajak telongjem  ka tentetnüaka Manipur state dak alaka Assam aser Arunachal nungi marur aser Myanmar nung alirtem adentsübaji temulung agi bilemyonga mapa agi sayutsübaji tasak lir. Aji oda, Nagaland nung alir Naga nunger o Manipur nung alir Naga nunger na kija agi Naga Hoho nung ulushia kümer mapang tatsüka ao maoka nung Nagaland anüdoklen alir Naga kintem Naga Hoho nungi oa adok. Iba sülen tang mapang tatsüka tsüngda Naga nungi Lotha Hoho oa adok aser ano tang tesüsa Sumi Hoho o Ao Senden na oadokogo. Joko, tang Naga Hoho nung dena alibaji Nagaland nung Tenymia kin parnok pongo troka den Manipur state nung alir Naga kintem dang anünga lir. Ibaji tang Naga Hoho nung lenirtem asoshi dang masü saka asenok ajak asoshi tebilemtsü lir. Naga nunger kin ajak dena aliba Naga nunger telongjem tentet ka tang ama tensa nungsa tenüngdakba. Ajisüaka, tashi itshitsü melen loksaa aoba angudang kanga sasaa bilemer. Atangji, Nagaland anüdoklen aliba Naga kintem Naga Hoho nung madentsüsa akümba aser Lotha Hoho-a Naga Hoho nungi atsünginba kuliji balala lir, ajisüaka tang tesüsa Sumi Hoho aser Ao Senden Naga Hoho nungi atsünginbajibo Rongmei nunger nem Nagaland nung parnoka kin ka ama alitsü jenjang agütsüba ken o nungi atsünginba liasü. Atangji, Naga Hoho-i ashiba ama, Rongmei nunger nem Nagaland nung kin ka ama züngshitsüsa jenjang agütsü junger ta state government dang ashitsü lemtetbaji Ao Senden aser Sumi Hoho nungertem dena liasü südi. Ajisüaka, idangji parnoki merajemi aser mangateti hai haura aka südi mesüra telok nungbo kecha mejembi ser oa senden nung adenertemi junga mebilemdangi agizük südi. Iba jagi tangang Rongmei nunger nem Nagaland nung Naga kin temeja ka ama alitsü jenjang agütsür ta metetdaktsü dang-dang ibaji anema Ao Senden, Sumi Hoho aser Lotha Hohoi anir ola adoker. Aji oda, state sorkari asüngdangba ama, Naga Hohoi Rongmei kin nem Nagaland nung kin ka jenjang  agütsütsü temsüa lir ta agütsüba ken o nung ajemdaker state government-i Rongmei nungertem nem Nagaland nung Naga kin ka ama  jenjang agüja alinungji, kin asem Ao, Lotha aser Sumi Hohoi Naga Hoho dang iba ken o ji meyipa agiadokang ta ashibaji tim dang liasü. Atangji, parnoki ashiba amato Rongmei nungertemji Nagaland nung tanga Naga kin kümteta aliba den kasasa  Naga kin jenjang agütsütsübaji tim masü, anungji bilemdangtsüla liasü. Ajisüaka, Naga Hoho lenirtemi mapang shitak nung temulung mechii aliba kin asemji jar parnok tebilemba süoktepa jembitsü melen osangkakettem ajanga dang parnok temeten aser tangarji tai ta asüba osang dang metetdaktsüba agi ano lenjii aruteptsü melen talangka pialogo. Joko, tangbo Nagaland nung kin tulu asem Naga Hoho nungi oadoker asünungji, Naga Hoho teloki Naga nunger tenüng nung jembia inyaktsübaji kanga mesademi kümogo. Iba amai melii  Naga Hohoi pilaa aoba kintemji bushia oagi ajuruteptsüla aser kin tasen ka züngoknüdang Naga Hoho raksatsüsabo masütsüla. Kin ka dang nungibo Naga nunger kin ajak longjema alibasa tajungba asütsü.