Naga Hohoi Lotha, Sumi aser Ao kin ajurutsü lemtet

Kohima, Sept.28 (TYO) : Nagaland state government-i Rongmei nunger nem kin jenjang (tribe status) agütsüba tsütsülen nungi Naga nunger kin asem Lotha, Sumi aser Ao kintem Naga Hoho nungi atsüngina alitsü lemtetba ken o tanü Bodbar nü Naga Hoho senden nung benoka jembiogo aser iba senden ajanga item kin asem dang parnoki Naga Hoho nungi atsüngina alitsü lemtetba telemtetbaji meyipa reprangshir Naga Hoho nung shilem agitsü asoshi mepishia metetdaktsüogo.

Rongmei nunger nem kin ka jenjang agütsüba nungi adokba ken o nung mangatettep ser Naga Hoho nungi atsüngina aliba kin asemsangertem denji ajurutepa jembitsü asoshi nisung terka agi akümba committee ka shimtsü tanü kasa senden nungsa Naga Hohoi telemtetba agiogo.

Rongmei nunger nem ‘Indigenous Naga Tribe status’ agütsüba ken o nung, Naga Hohoi ashiba agi,  Nagaland state government-i Naga Hoho dang tebilemba asüngdangba ama 2008 küm September 5 nü senden lia Rongmei nunger nemji ‘Indigenous Inhabitant status’ agütsütsü asoshi teloki mulunga renem aser iba telemtetbaji state government nem metetdaktsü, ajisüaka 2012 küm Nagaland government-i Rongmei nunger nem ‘Indigenous Tribe status’ agütsü. Iba jagi Zeliang Peoples’ Organization (ZPO) teloki iba telemtetba anema okadak ken o benoka lir ta Naga Hoho-isa metetdaktsü.

Aji oda, tang Naga nunger kin kari mepelaba metetdaktsüba ngua state governmenti iba ken o meyipa reprangshitsü asoshi Cabinet Sub-Committee ka shimbaji telemtetba shitak agiogo aser iba committee jagi nüngdakba purtem ajak ajurua tangatettep kati arutsü imlar ta Naga Hohoisa metetdaktsü.

Kasa senden nungsa Naga Hohoi state government dang  Nagaland Municipal Act 2001 reprangshia yanglushitsü asoshi takangba agütsütsü lemtetogo.