Naga Hohoi Rongmei nunger atema züluba shidi agiener; Ao, Sumi aser Lotha nungertem meyipa ajar

Kohima, Nov. 22 (TYO) : Nagaland nung alir Rongmei nungertem nem tanga Naga kintem den kasasa asütsüsa Nagaland sorkari “Indigenous Naga Tribe” jenjang agütsüba dak sendakba nung Naga Hohoi tamalen, iba telemtetbaji magidang Nagaland sorkar nem agüja aliba shidiji Naga kin asem Ao, Sumi aser Lotha nungertemi meyipa agitsüla ta akangba ama meyipa agiogo ta tanü Mongolbar nü sangdong ka nung Naga Hohoi metetdaktsüogo.
Naga Hoho sangdong nung ashiba agi, tamalen Nagaland government-i Nagaland nung alir Rongmei nunger nem ‘ tribe’ jenjang agütsütsü atema tebilemba asüngdanga züluba shidi langzü dang, parnok nemji Government Notification No.AR-8/76 Dated, the 28th April, 1977 nung shia aliba ama Garo, Kuki aser Kachari nungertem den kasasa “Indigenous Inhabitants of Nagaland” jenjangang agütsü tajungba asütsü ta metetdakja liasü saka kodanga Rongmei nunger nem ‘Indigenous Tribe’ jenjang agüjang ta Naga Hohoi zülua mali.
Ajisüaka, Naga Hohoi agüjang ta ashiba agi state government-i Rongmei nunger nem ‘Indigenous tribe’ jenjangji agütsü ta kin asem jagi aija August 31, 2016 nü parnok Naga Hoho nungi parnoksasa atsünga adok ta kasa Naga Hoho sangdong nungsa metetdaktsü.
Ano, Naga Hoho-isa October 14, 2016 nü Chief minister ajurua state government-i Rongmei nunger nem “Indigenous Naga Tribe status” agüja aliba telemtetbaji khen meyipa reprangshitsüla ta takangba ka agüja liasü aser iba sülena Naga Hoho toktsür aoer kin asem dang parnok telemtetbajia meyipa reprangshitsü asoshi mepishia liasü saka, tia mejungi, tang tashi parnok nungi telangzüba tajung mangur ta Naga Hohoisa metetdaktsü.
Iba ama mapang ka nung Naga Hoho-i shimba telok ajanga November 18, 2016 nü Naga Hoho Executive Council dang Naga Hohoi state government nem Rongmei nunger dak aketba ken o nung agüja aliba ken o ji meyipa agitsüla ta arunungji, November 21, 2016 nü Naga Hoho senden nung iba tebilemba ken o ji benoka jembir, iba kasa ken o ji CNTC kübok aliba kin asem Ao, Sumi aser Loktha kin asemi aginüba ama meyipa agitsü lemtet, anungji tangbo kin asem prongla Naga Hoho nung arua adentsü imlar ta kasa Naga Hoho sangdong nung Naga Hoho tir Wb.P.Chuba Ozüküm, tongti zülur Wb. Mutsikhoyu Yhobu aser Deputy speaker Wb. Kenyuseng Tep nungertemi metetdaktsüogo.