Naga kaketshirtemi NSCN-IM dang saru saruba anentsü akhanger

Dimapur, October 21 (Agencies): Kaketshir tentet kati NSCN-IM dang Arunachal Pradesh nung education deparment balala dang nungi ozüng alema saru saruba anentsü atema takhangba agütsü.
National Socialist Council of Nagaland – Isak-Muivah (NSCN-IM) den senden ka amendang Arunachal Naga Students Federation (ANSF)-i, saru saruba ajanga district aika nung shisaliok terenlok nung tetsükdaktsü agütsür ta shiogo, ta ANSF sangdong ka ajanga metetdaktsü.
ANSF-isa, NSCN-IM-i state nung rongsenkettsüng aser loktiliba nung tangar memenepba district asem- Tirap, Changlang aser Longding nung saru saruba ajanga school aser college aika mapatong nung senotsü tsütsü tebilemtsü adokogo, ta ashi.
“Tirap, Changlang aser Longding nung school aser college tem nung tesayurtem aser ketdangsertem aser department nung ketdangsertemi timtem ajangshiba ajanga iba ya mepishitsüsa aküm. Ibaji dang masü saka shisaliok junga manguba ajanga lanurtem taküma raksar,” ta kasa sangdong nungsa shia lir.
ANSF-i ashiba agi, Tirap, Changlang aser Longding ya rongsenkettsüng tsütsü tashimaitba district tem lir, kong tsüraburtemi pei chirnur senotsü tali adokba school temi odaktsütsü makoker.
Ali nungi adokba rongsen jenti liaka item districts asem ya rongsenkettsüng nung tashi mait, iba den külemi item district ya National Socialist Council of Nagaland – Khaplang aser United Liberation Front of Assam aliba tesemtem lir.