Naga kaketshirtemi temelenshi bener arutsüla : Chotisuh Sazo; Neiphiu Rio-i yimjung aser telongjem alitsü ayongzük

Dimapur, May 31: Naga Students Federation (NSF) 27 buba lokti mungdang nung tongti tesemdanger ama shilem agidang, PHED Minister, Chotisuh Sazo-i kaketshirtem dang temelenshi bener arurtem asütsü atema tayongzükba agütsü.
“Tanü Naga loktiliba nung Naga yimtem teloktem nungi tenzüker civil society teloktem lemsar aliba ajanga asenoki tetsükdaktsü aser timtem jenti ajurur. Iba tebilemtsü ta lanurtemi angatettsüla aser pei yimtsüng aser kin atema mebilemi, Naga nunger ajak atema bilema asen loktiliba nungi temenentem agientsüla,” ta paisa ayongzük.
NSF tenzükertemi alizüng aser mangdang tejangja yur iba telok tentet. Parnoki kin sasep nungi masü saka Naga nunger ajak ta asüba tangatetba nung NSF tenzük, anungji asenoki iba senmang tajung agizüktsüla aser mapa küma inyaktsüla, ta Chotisuh Sazo-isa ashi.
Nagaland nung Dr. Shurhozelie lenisüba kübok sorkari lanur nem maongka kasa agütsütsü nükjidong nung maparen inyaker, saka sorkar kija agidangbo mapa magütsüteter. Anungji, lanurtemi degree ngur mapa busitsüba dang masü saka mapa agütsürtem asütsü atema merangtsüla, ta paisa shisem.
Tanü iba sentong nung Union Minister of State for Home, Kiren Rijiju tongti tesemdanger ama shilem agitsüba liasü saka tsüngsang majungba ajanga pa marutet. Ajisüaka, pai mungdang amunger dangi shidi ka yokba zünga metetdaktsü.
Ano, Nagaland Chief Minister, Dr Shurhozelie Liezietsu-a NSF mungdang indang chief host lir saka pa tanga mapa kar ajanga shilem magitet.
Iba sentong nung PHED Minister, Chotisuh Sazo-i Tzürang lenden nung NSF nüngshilung sayatsü aser ibaji ABAM Executive Secretary, Rev Dr Mar Atsongchanger-i meshiteta sarasademtsü.
Sentong nung NSF tir, Subenthung Kithan-i tir o jembi, Alam Herang-i ken ka aten, Arunachal Pradesh Naga Students’ Federation-i sobaliba yartsüngsang ka sayu aser AKM nungi accapella telok kati ken ka aten.
Tanü Lok Sabha MP, Neiphiu Rio-ia ‘cultural regale’ sentong nung tetushi süa jaoker ama shilem agi.
“Naga yimten tebilemtsü atema inyakba mapa ajanga nübortem nem tamakok bener marutsü, kechiyong India sorkari iba tebilemtsü ya yimten onük ka ta agizükogo aser angatetteptsü mulunga agizükogo. Ajisüaka, Naga nunger melongjemba agi iba ya ano mebentetti lir” ta Neiphiu Rio-i o jembidang ashi.
“Asenoki mangatettep alibatem toktsütsüla aser Naga yimten tebilemtsü lemtettsü atema asenoki longjemer tejakleni aotsü atema merangtsüla” ta paisa ayongzük.
“Tanü asenok lenjem nung nokdaka lir aser telemtetba shitak agitettsü atema shisatsü aser tarutsü nükla tajung nüngdaker. Iba dak sendakba nung Naga Students’ Federation(NSF)-i loktiliba nung telongjem adoktsü atema ajak den mapa inyaktsüla. Asenoki tarutsü putu yangerdang, NSF-i maneni asen loktiliba nung tesangwa ka asütsü imlar” ta Rio-isa shisem.
Bodbar nikongdang cultural regale sentong nung All Sumi Students Union, Thangkhul Katamnao Saklong, Angami Students Union, Maring Students Union, Chakhesang Students’ Union aser Ao Kaketshir Mungdang temi shilem balala agi.