Naga Kin Hohotemi WC, NNPGs den ajurutep

March 20, 2019 nü Niathu Resort, Chumoukedima nung Naga Kin Hohotem aser WC, NNPGs senden amendang agiba noksa ka angur.   

Dimapur, March 20 (TYO): March 20, 2019 nü Nagaland Kin Hoho tem aser Working Committee (WC), NNPGs külem senden ka amen.
Niathu Resort, Chumoukedima, Dimapur nung amenba senden nung WC, NNPGs aser India sorkar tsüngda yimten olemtep agiyonga aruba osang metetpelaa liasü.
Tanü Naga nungeri nüngdakbaji Naga Yimten teloktem tsüngda yimjung aser telongjem lir anungji Nagaland Kin Hohotemi Naga yimten telok ajak tangatetba kati arudaktsütsü atema inyaktsü ta tanü senden nung mulungtepa telemtetba agi.
Working Committee (WC), NNPGs aser India sorkar tsüngda yimten olemtep takok ngua agiyonga aruba aser Agreement ka dang agitsüba lir ta ashiba angashia Naga Kin Hohotemi pelaba metetdaktsü.
Naga nungeri külemi dang linür ajisüaka tanü putu nung Naga nungeri agizüktettsüsa telemtetba ka agitsü atema WC aser India sorkari tekaratiba nung mapa inyaktsü ajungshir ta senden nung adenertemisa metetdaktsü.
Iba senden nung Ao Senden (AS), Angami Public Organization (APO), Chakhesang Public Organization (CPO), Chang Khulie Satchang (CKS), Konyak Union (KU), Lotha Hoho (LH), Pochury Hoho (PH), Phom Peoples Council (PPC), Rengma Hoho (RH), Khuiamnungam Tribal Council (KTC), Sumi Hoho (SH), Yimchunger Tribal Council (YTC) aser Zeliang Peoples Organization (ZPO) aden.