Naga lanur aser tetsütemi sorkar tajung ka aginür

Kohima, Tsüklai 16 (TYO): Nagaland nung hopta ana majungdang election agitsü lir aser iba atema tetsütem aser lanurtemi state tejakleni aotsü atema ochimashi maliba sorkar tajung ka aginüba metetdaktsüogo.
Naga Mothers Association (NMA) tir, Abeiu Meru-i tanü ashiba agi, ‘election magidang Naga yimten latettsü’ yimyim magizükba atema onok tetsütemi nemjema bilemer.
Political party temi candidate tem nem ticket agütsüba dang masü saka nomination süogo aser tang constituency balala nung election dak sendakba lendong atalokba osangtem angashir aser iba atema kanga jashir, ta Abeiu Meru-isa ashi.
“Candidate pusemertem tsüngda yamai mepetmesü adoka rarara, kodaser asenoki candidate tajung adoktsü teimla yutettsü? Parnok aika atema election ya sen aser tashi sayuba mapa ka dang kümogo” ta laisa shisem.
Taoba Nagaland sorkar kümsük nung lennirtem tashi raktepba asenoki nguogo aser iba jagi asen state atema takoksa bentsür aru. Tetsütem ama onoki Nagaland nung sorkar tajung ka aginür. Sorkar tajung aser takang ka lira, terenlok alitsü aser tejakleni aotsü, ta Abeiu Meru-isa metetdaktsü.
YouthNet Nagaland Chapter Director, Lezo Putsure-ia “Nagaland nung lanurtemi terenlok, mapa, asalentong tajung aser tangatetba tajung nung noktakba lennirtem aginür” ta ashi.
Tanü alima kanga kara ainba mapang, tangalenbo lanurtem mapa inyaktsü angur, taküm jangratema alir, lenmangtem tajung lir, alima kanga junga lir. Ajisüaka, yagibo yamaji masü, anungji onok lanurtemi tanga lima ama kasa kümdaktsünür, ta Lezo Putsure-isa shisem.
Naga nungertemi ochimashi maliba, tashishitsü maliba aser kuli agütsütetba sorkar ka aginür. State renloktsü atema tejaklen aotsü atema inyakba sorkar ka aginür, ta paisa metetdaktsü.
Ano, külen All Nagaland College Students’ Union president Katho P Awomi-i “Naga loktiliba indang tarutsü ama onoki lanurtemi sorkar kechi arudir aruaka lenmang tajung aser terenlok mapa inyakba sorkar ka südaktsünür” ta ashi.
“Kechi teloki kümdir kümaka taruba state sorkari state ajangzüktsü atema education policy tajung ka yangludaktsünür” ta Katho P-isa shisem.