Naga lanur kati ‘Colors Infinity Show’ nung shilem agitsü

October 10, 2015: Nagaland nungi Kimatsur Jaming-i Colors Infinity English Music Reality Show- ‘The Stage’ nung shilem agitsü ta osang kar ajanga jangjaogo.
Iba sentong ayongertemi, ‘Nangzükbaji inyaktsübasa’ ta nükjidong yur Colors Infinity’ inyakyim aor aser iba ya ajanga linük nung mezüngbuba temesüng oshi nung ken tentepba sentong lapoker. “The Stage” ya October 10 nungi tenzüka Honibar aonung shi 9:00 ako nungi television nung yoktsü aser iba sentong Shibani Dandekar-i ketdang asütsü, ta metetdaktsüogo.
Parnoki sangdong ka ajanga ashiba agi, ken nung mongin aser Music Director pezü kentener Vishal Dadlani, kentener aser Actress, Monica Dogra, Music Director, Ehsaan Noorani aser MD & CEO, Universal Music Group South Asia aser EMI Music South Asia, Mr. Devraj Sanyal nungeri iba sabang dak alang shisatsü agüja len ania tendangtsü (Judges).
Iba sentong ya SOL-i produce asütsü aser tetoktepa nung shilem agirtemji nüburtem vote agi masü saka judges-i dang tendanga tajungba shimtettsü nükjidong lir.
Tetoktepba nung shilem agitsüpur parnok lanur 20 tashi lir aser hopta shia parnoki shilem agiba dak ajemdaker judges temi majunger shimdoktsü aser tajungertem rongnung tajungtiba ka shimtettsü.
Temaba jenjang nung takok angusang/la Universal Music ajanga kensep adoktsütsü, yimti 10 sema kentena jajadaktsütsü, Viacom 18 (English Entertainment) company-i sabang ajak nung nungita yaritsü aser Renault Duster gari tasen ka agütsütsü.
EVP Viacom18 nung tekolakba-i, “The Stage ajanga linük nung temesüng oshi agi kentener tajungtibatem sayutsü. Iba sentong ajanga tang iba sabang nung parnok sempet sayuba dang masü saka tarutsü atema lenmang sadema lapoktsü,” ta tebilemba lemsatepa liasü.
Iba sentong nung tetendanger Vishal-i, “Alima netsüng yongsük troksü lemer kasübo India nunger lir anungji India nungia ken tsütsü ‘global superstar’ kabosa alitsü nüngdaker. Ni bilemer tang ya ibaji asoshi mapang tajung lir,” ta Brihostibar nü ‘The Stage’ lapokba mapang media dang ashi.
“India nung English ken tanga linük nung alir den kasa tena temteter aikasa lir aser parnok sempet tajung linük nung dang masü saka bendanglena kanga tushir,” ta paisa ashi.
Ano Ehsaan Noorani-ia, “Linük nung Hindi aser English naprong aliba ken angar aser atener aika lir. Asenoki English ken angar mali amai bilemer saka yamaji masü, English ken angar aser temteter aika lir, ajisüaka parnok sempet sayutsü atema sabang peria mali,” ta ashi.
“Northeast tesetem- Nagaland, Sikkim, Mizoram, Shillong aser Arunachal Pradesh kodang reprangdangdir parnoki pei oshi mesüra temesüng oshi agi dang jembir aser yangji aliba kentener teloktemi English ken dang atener aser atemer,” ta “Dhobi Ghat” film nung actress aser kentener Monica Dogra-i ashi.
Iba sentong nung Dimapur, Nagaland nungia Kimatsur Jaming-i shilem agitsü asoshi renema lir. Music ji pa atema tsüngrem, ta pai ashidang nükjidong atongba dang nungibo ibaji atongtsü arishidangang tajangzük tuluba agur, ta shisem.