Naga lanurtemi asentzü sena mapa inyaktsüla: Zhaleo Rio

Dimapur, Rongchii (April) 16 (TYO): Rongchii (April) 14, 2018 nü NLA Deputy Speaker Zhaleo Rio-i Angami Students’ Union, Shillong indang Hon Jubilee nung tongti tesemdanger ama shilem agi.
Iba benjung ya State Library Hall, Shillong nung amung aser Zhaleo Rio-i o jembidang state adena orr aliba kaketshirtemi yimya sübatsü indang tayongzükba kar agütsü.
“Nisung ka taküm nung takok angutsü aser azükarua alitsü atema mapa meranga inyaktsüla. Naga nunger lanurtemi asentzü sena mapa inyakba angazüktsüla aser iba ajanga tangartem asen limai aruba khuret azüoktettsü” ta pai ashi.
“Tangartem asen lima nung arua shishilembaba ajanga asen rongsenkettsüng jenjang tamajungba akümer. Asenoki sorkar mapa angutsü indang dang masü saka pei sasa züsenteta alitsü atema bilemtsüla. Iba tangatetbaji Khasi nunger dakbo lir” ta Zhaleo Rio-isa shisem.
“Asen state nunga pei sasa mapa inyaka litettsü atema teinyaktsü aika lir. Ajisüaka iba atema asenok tila akümtsüla aser bendanga agütsütsüla. State nung kechi lir’ar memetet sür mapa manguba tebilemtsü indang mejembitsüla” ta paisa metetdaktsü.
State adena orr aliba Naga nungertemi tangar yimya tajungtem angazüktsüla. Shillong nung merükmejuba ya Nagaland nungbo mapang talangka lir ang mapa küma inyaktsü südi ta bilemer, ta Zhaleo-isa ashi.
Iba benjung nung Political Adviser to Dy. Speaker Tokihe Zhimomi, Chairman, NHHDC Miathou Krose, social worker & NDPP party lennir Kevirhekho Kehie aser Founding member, NDPP Gohu Vüprü nungertemi Deputy Speaker meina ao.
Iba sentong nungsa Methanilie Jütakhrie and band aser ASU, Nagaland President Visako Rino-i anir ketdangpurtem aden.
Shillong nung kaketshir aser public lennirtemi ashiba ama Zhaleo Rio-isa NEIGRIHMS, Shillong anasa yanglutsü aliba Nagaland Rest House kimung semdang.
Iba kimung atema ashishitep ken o kar adokba ajanga küm aika anepalu mesüi dang arur aser Rio-i iba tebilemtsü tekaratiba nung angatetteptsü aser ki yanglutsü ta nangzük.
Iba mapang Assistant Resident Commissioner, Nagaland House, Shillong-ia Rio meina ao.