Naga lanurtemi ozüng alema arurtem indang khuret abener; Sorkar dang ita 1 tsüngda ILP reprangshimtsü latettsür

August 24, 2018 nü Naga club building Kohima kima nung college aser school balala nungi kaketshirtem adenshiba noksa nung angur.

Kohima, Luroi (August) 24 (TYO): Tanü Kohima nung kaketshir aser lanur aikati tzünglu aruaka yimdong nung lungkak aitba sentong takok ngua agiogo. Parnoki ozüng alema arurtem aser Dimapur district nunga Inner Line Permit (ILP) tenzüktsü atema takhangba agüja lungkak ait.
Naga Student’s Federation (NSF)-i item takhangba agüja lungkak aitba sentong tanabuba shilem tanü agi aser lanur aika Naga Club building kima nung shilem agitsü atema adenshi.
Ozüng alema arurtem menokdangra, parnok lisopurtem nütsüng yongsük den teimba akümtsü ta lanu putu shisabulua bilemer, ta NSF tir Kesosul Christopher Ltu-i tanü o jembidang ashi.
“Sorkari Nagaland nung ILP mapa shitak meinyakteter. State kübok check gate balala nung iba mapa meinyaker aser bendangertem aruba mesüra aoba record kecha mayur” ta paisa ashi.
NSF-i state sorkar nem aiben ILP mapa shitak inyaktsü atema tezülubatem agütsüogo saka meinyak. Sorkari ozüng alema arurtem aser ILP malirtem mita mereprangba agi taküm August 8 nü NSF-i ILP mita ao, ta Ltu-isa shisem.
“ILP mapa inyakba nung NSF-i state sorkar nungita yaribaja tim dang, aser state sorkari iba mapa nung NSF aser civil society tem teyari agia mapa inyaktsüla” ta entrepreneur aser NSF indang ILP committee züngsem, Neichute Doulo-i ashi.
“Nagaland nung ozüng alema arurtem teimba kümdaktsüba tebilemtsüji Naga nunger ajaki abentsü. Asenoki ozüng alema arurtem dang nungi lijaliyong tashi, asenok parnok yarirtem asütsü. Asenoki parnok nem alu ayimtsü ali agütsü tashi, parnok nütsüng yongsük teimba akümba manentsü. Asenoki parnok taa dalang atema mapa inyakdaktsüba tashi, parnok taküm liyong aotsü. Asenoki parnok gari anitsü aser ki yanglutsü atema amshi tashi parnok mapa angutsü” ta Doulo-isa metetdaktsü.
Item ya sorkari inyakba masü saka asenok sensotemi inyakba mapatem lir. Ozüng alema arurtem künü anogo Naga nunger samatsütsü. Iba khuret ya shinga dak-a masü saka asen sasa tai tongloktsütsüla. Naga lanurtemi sorkar mapa dak dang rangloker shishilembatsü aser aluyimtsü mapa meinyakra, ozüng alema arurtem teimba züintsü. Bangladesh nungi dang masü saka China, Pakistan ama linüktem nungia nisungtem arutsü, ta paisa shisem.
Lanurtemi shishilembabaren jangratsüla aser temulung agütsütsüla. Lanurtemi takar aser takoker akümtsüba dang masü saka Naga nunger tarutsü atema bilema inyaktsüla. Asenoki asen nisungtemi lapokba dokantem nung dang shishitsü, asen nisung nem dang mapa inyakdaktsütsü, asen kiojen aser shishilembadak tangar nem masü saka asen nisungtem nem dang agütsütsü atema bangzüngti, ta Doulo-isa ayongzük.
Tanü kaketshirtem aser lanurtemi tzünglu aruaka Naga Club building nungi Chief Minister’s office tashi jajayonga ao aser Advisor to CM nem memorandum ka agütsü.
NSF aser federating units-i Illegal Immigrants aser ILP malirtem mita aoba mapa mezüng shilem inyakdang Nagaland nung ILP mapa shitak meinyakba putet ta memorandum nung shia lir.
Nagaland nung lisopurtem atema lendong tulutibaji Illegal Immigrants aruba ya lir. Bengal Eastern Frontier Regulation (BERF) 1873 shitak meinyakba aser ILP kübok Dimapur district medendaktsüba ajanga Dimapur district ya ozüng alema arurtem tejenokdak ka kümdaktsüogo, ta NSF memorandum nungsa shia lir.
Dimapur district nung taitsü aketba nisung aika lir kechiyong parnok aika ket nung kulikaket mali, ta NSF-isa ashi.
Naga nunger aser lanu-putu indnag tarutsü kümzüka ayutsü atema ILP kübok Dimapur district dendaktsütsüla. Bengal Eastern Frontier Regulation of 1873 nung lateta aliba ama Inner Line Permit telontget ulushitsüla, ta NSF-isa metetdaktsü.
NSF-i iba mapa inyaktsü atema state sorkar nem ita ka mapang latettsü.