Naga lima aser Koridang tasen ka yanglutsü tejangraba nung noktaker: C. Lima Imchen

Mokokchung, Tsüklai 21 (TYO): 28 Koridang Assembly Constituency nungi Nationalist Democratic Progressive Party (NDPP) ticket amer toktepsang C. Lima Imchen-i Tsüklai 21 nü Chungtia, Aliba aser Kinunger yim asem nung pa election-i aitsü asoshi sangdongba sentongtem agia jajaogo.
Pai tanü yim balala sema jajadang, senso shia Koridang MLA lar masütsü aser lenla ajak nung (kinük pezüsü) terenlok bener arutsü tejangraba nung election nung noktaker, anungji, nüburtemi pa nem agütsütsü asoshi mepishia ashi.Tsüngrem lenisüba nung Naga lima aser Koridang Constituency tasen ka yanglutsü mangdang lir, ta paisa shisem.
Koba sorkar arudir aruaka, India sorkar nungi dang rongsenji meshiküm, anungji, BJP den teka amteper centre nungi Naga lima terenlok mapa balala inyaktsü, ta ashi. Teka amteper terenlok aser temoatsü agiba nung kechi tai lir, ta paisa asüngdanga ashi.
Tanü asen lima ‘Clean Election’ yimyim nungji paia nungiter aser election maparen ajak nung paia clean election dak ajemdaker inyaktsü, ta ashi. Koridang constituency kübok yim shia khuret balala lir, itemji yim shia nung yimden yimsüsür aser lenirtem ajanga shisa bendena terenlok mapa balala ochi shia inyaktsü tejangraba aliba paisa lemsatep.
C. Lima Imchen ya Longkhum yimtiba nungi lir, Bihar cadre IPS officer ka liasü aser pa ya police medal aser President’s medal award anguba nübu ka lir.