Naga lima nung America nunger Yimküm ana lir

~ A. Imdong Jamir, Sungkomen.

Mezüngbuba nung Molungyimsen yim, tanabubaji tanü IMPUR MISSION CENTRE ya par yimküm lir.
1952 küm Dr. C.E Hunter tanüla temeshi agi asüngba missionary Ao kin asoshi temulong raksaa mangyima jepa yutsür aoba Indian tzüyim nung pa taküm tempanga pa tasümang tzüyim manung ponger yokba otsü lir. Dawid-i ashi, Tzümetsüng agi ama nai parnok apunger aor TK 90:5. Ao kin asoshi ibaji Yirusalem yimti lir. Kibuba Tsüngrem Pai pa mulongba nung Pa bang ajanga jembizüka yokba YIRUSALEM KONANG YAMAI :
1. Yirusalem dang temulong alemba temeshi yimti ta ajatsü. Isaia 1:26.
2. Senzüka metoktsüba yimti ta ajatsü. Isaia 62: 12 (b)
3. Atangji yimti ta ajatsü. Zek 8:3
Kibuba Tsüngremi ashi, Ni milen amer Yirusalem bushitsü Zef 1: 12.
Iba yimti nung America nunger Tanüla Temeshi agi asüngba tamang tir aika nüktzü yimoka lir.
Impur Mission Centre nungi ABAM walunir asür Rikum shiba dak missionary Hunter-i jeba nemeta sarasademtsü, pa meyang (anpung) sür 1989 küm yi tongpang tulu jazüka rara tulu liasü. Iba tongpang ya Yihusua tendak anüi Gibon manung marakzüi noktakba ama, itaia Aijalon lenden nung marakzüi noktakba ama, tongpang tulu liasü. Iba anogo nungi tanü tashi Kibuba Tsüngremi Naga nunger tamangertem tebo akümba maneni lir. Talisa Tsüngremi asen Ao kin dak saklokba maneni lir ta Tanüla jembir. Tawa Mokokchung Town Ao Arogo 10 sannükertemi anir kaketshir merijang asem youth revival sentsüwangshia katsüogo. Kü chirtem ochi nung jajaba angashiba dang nungi ni tanga tepela tuluba kecha mali, Yohan tasembuba shiti 1: 4.
Maneni Dimapur Ao Baptist Arogo nung tebutem (Father School) nung tamanger tajung 55 tashi graduate südaktsüba item rongnung atishi kü 84 tambuti aser küm 26 tanubutisang, item mapa tajung angudang nüktzü yima züngogo. Aturar 55 kinüngtsü chirnur semchirtem koda tepelatsü. YAMAJI NISUNGI NENOK MAPA TAJUNG NGUA KOTAK NUNG ALIBA NENOK TEBU SENTSÜWANGSHIDAKTSÜTSÜ ASOSHI PARNOK MADANG NENOK TESAWA JUNGKAI ADOKDAKJANG. MT 5: 16.
January 2015 ABAM mission osang lenir executive secretary Rev. Dr. Mar Atsüngchanger aser Rev Dr. Nuklu Longkumer lenisüba nung tanü tensa den tapet Omen-Samaba Bushitsü aser Kümzüktsü Asoshi, Arunachal Nocte kin tazü lima tanüla wadang tulu inyaka aoba angudang temulong chia repranger. Missionary Paul mitsa nung mangsa tasü taküm memetet züker alua mejanga alidang Kibubai Pa anasa nokdaka ashi, tasü itang Rom nunga yamaji kuli asütsü. T.Map 23: 11. Asen kangshidang, asen ala-ashidang Pa sentsüwangshir. Taku marok mejemi kotak yimli aitsü makok.
Sungkomen Baptist Arogo Rev. O. Yashi ,pastor lenisuba nung Mission Board meyang sür eastern Khiamnuingan arogo tsüngdong oa repranga tekülem ki südaktsüdaki. Süngkomen Baptist arogo küpok tamanger kibongtemi pastor 27 nem ita sen agüja sarasadem nung yaridagi. Kibuba Yisui ashi, item tilatem nen shibai tzüzü marok tanga tajemtsü agütsüdir pei tajangzük kodakang mesamatsü.
Tanü ABAM lenisüba nung Ao kin tamanger tajung takar nungi sensaker tashi Nocte kin asoshi rongsen tenla, nübo tenla tamang sarasadem tenlaba Kibuba Tsüngremi repranga lir. Kanga sensakbai parnok jenti angadi agütsüba nung aren. 2 Kor 8:2 (b)
Ajiang alu aluri alurur aser tsükmenatsü aneteri metsü proker meneptsü anogotem arudagi ta Kibubai ashir . Amos 9: 13
SARASADEM
Oh! Kibur Tsüngrem, Ozü Ao kin nungi tamang nokinketer tamangdir adokdakjang. Sensaker, Mekokmeiner mesütsü aser nür tsükmenatsü lu nung tenzükertem yasatzüra nung yaritsü taka taiter mejonga akar adokdakjang. Ochi nung tasü tait nübor meimer yimsüsür tajung atokdakjang. Tanüla mangdang ken atener lanur adokdakjang. Ozü Ao kin nem North East kin ajak ya agüjangma. Ozü lima temenen teshinem ya rongdoktsü kotak nungi revival milak yipru tulu ka yokangma. Amen.