Naga Lima tia jenjang asoshi tsubuseta mebilemer no!

~ Tiala Imchen, Dimapur.

Tanü asen Naga lima nung Armed Forces Special Power Act (AFSPA) agüja aliba tia ya tsübua mebilemer no (?) ta shisabolu marem iba ocet ya zülur. Iba Central Rule, koba Disturbed Area Naga Hills nung amshitsü ozüng 1958 nungi tenzuka tanü tashi tanen makai atsülanga dang arudagi, ibai atema asen  Naga nungertemi temulung ayanga tsübua mebelimer no ? Iba ozung tesashi indang junga memetet aser mangatetba agi asu ? Mesüra lokti atema dangji ta bilemba agi asü ? Kechiba asen lima nung iba ama tetsübutsü ozüng tulu center nungi agüja aliba atema ola madoker ? Naga nunger lenirtem pei tangar den ola adoka jembitettsü rogo tashitemeter jenti lir to ! Iba amala ozüngji aitsütsüla ta dang lokti tentet temia jembiba angur. Saka shitakbabo item “ammang ozungtemji”asen Naga lima nungi agienang ta takhangba (memorandum) tezüluba nung center nem agütsütsüla.

Manipurtsur Irom Sharmila shiba dang Iron Lady ajar,la aser lar telokibo par Manipur lima nungi iba amala “ammang ozüng” koba dang AFSPA ajar, ibai tangsa par lima nungi agienang ta joko kum 10 tema lumia arur. Kasa ozüngji asen Naga Lima nunga lir saka asen nüburtemibo pei lima asoshi shisa mebului züzüa aliba angudang aiben süngmangsetasa bilemer. Yashi yakanü Manipur lenmang nung army convoy aoba mapang army jawan 18 khaset nung Kohima nung asen Aor chanu kaketshir kecha tai maketer rogotem India sepaitemi temulung melemi bilemba agi pur yamato züka rishikangshiba to aroka mebilemer no ? Iba tatalokba  atema to Naga lima yimsüsürtemia kecha meshitet asenok dang takoksa aküm. Kechiba süra asen lima ya Disturbed Area ta 1958 nungi tenzüker tanü tashi iba ozüng atsülanga dang arudagi. Ano tawa center nungi iba ozungji küm ka atsülangtsüogo. Asen Naga lima nung army nung Non Commissioned tanishir kati temulung melemi bilemba nisung ka injang agi akhatsü, kidanga bomb ajungoktsütsü aser kiojen ajunga rongdoktsütsü dashi India sorkari tashi agütsüba atema asen nüburtemibo temulung mayanger no (?) ta bilemer. Na senso tajung ka ta nai bilemra,iba ama ozüng agütsüba anema nokdaktsüla.

Tesüiba 1950’s nung Naga nüjiso rara tenzükba mapang India sorkari tashiyim agi Naga nüjiso bushiba maparen anendaktsütsü mechi nung iba “ammang ozüng” tesashi ya yanglu. Jawaharlal Nehru prime minister yimsüsüba mapang, pai Naga nunger dang “Naga limaji azü agi ayong kümaka,0 Naga nunger nem nüjiso magütsütsü, “  ta ashi”. Aji sür pai India army Naga limai  mesemi yok,aser Naga nunger shiruru ama rishikangshiba dang masü, kiojen ajunga rongdoktsür,ano arem min tashi rongdoktsü. Iba nükjidongji arem nung Naga army camp ajunga samadakja nüjiso bushiba maparen anendaktsütsü mechi tashiyim mapa inyakba liasü.

Sorkari agütsüba ozüngji amer India sepaitemi asen lima 1950’s  nungi mid 70’s tashi yamai rishikangshia liasü: Tetsürtem yimjak nung tashiyim (raped) agi raksatsü,pei nisung o pei nisung na tenla kidang gun point nung medemdaktsü,tashiyim agi peii kozüba scü chidakja mezüngmeshiba,ano tsükchir jagi parnok tsüra matem tashi amshir külena mangsa lisü agi alener, parnok campi anir orr idakji ita anogo mezüngdangtet amshia ayu. Iba mapang teburtem langdem dak alaka temang mangsa nung ajok aser merangjok agi shilong zükteta züker külen ano lisü agi tesülen perepba alener sepai campi anir orr langkoshishia sendaker iba kübokji mi apur mokozü agi kudakja rishikangshiba,tepangi shir meshima lir. Saka iba mapang ola adoker mali asü. Shibai pei bang lapoka jembidir kasettsüba jenjang nung liasü.

Item tatalokba otsü tsüraburtemi ashidang,  asen nüktsü ayimer. Saka tanü asen tendak iba lendongji  menua maka. Kechiba süra kasa ozüngji tanü asen Naga lima nungi magien lir. Ano küm ka atsülangba angashia kü mulung tipmatemba agi asen nüburtem den lemsateper. 1950’s mapangji tanü 21 putu amai masü saka idangjia parnokbo raraba oset tapu balala peria liasü. Saka tanübo asen limaang süngla yamai renloka aor nung tangar bo koda. Tang cease fire asüba agi dang ashi, ibaia anener raraji tenzük nungbo minute ka nung Naga limaji mitsü akümtsü jenjang nung lir. Anungji tang yimjung mapang nung ya Naga nungertemi kanga sarasadema pei lima temeten asoshi mapa inyaktsüla.

Azü tokshiba ajanga kodanga nüjiso bener marutsü saka longjemshir Tsüngrem dak imlaba ajanga dang takok angutsü. 1950’s mapang asen tsüraburtembo Naga nunger ajak kibong ka chir ama longjemer tenzükba agi rishikangshi ajak ajangteta aruba medem, tanü shir iba lu nung nokdaka lir,parnokia tesüiba tsürabur nükjidongji meraksai longjemshir Tsüngrem dang mepia akhangtsü mapang tongja tongogoni. “Tsüngrem tsüngdang tamakoktsü kecha maka”. Amen.