Naga linük telemtetba nung noktaktsü: NSCN

Dimapur, August 3 (TYO): Th. Muivah-i anir NSCN züngsemtemi India sorkar den tesüsabuba olemtep alidang temulung masüba onük kar adokba atema tanü Council Headquarters, Hebron nung Joint Council Meeting ka menogo, ta MIP sangdong ka nung metetdaktsü.
Senden nung Steering Committee, Council of Kilonsers, Tatars, HoDs & Brigadiers aser temapurtem aden aser taoba mapang Collective Leadership, Collective Leadership züngsemtem aser NSCN ketdangsertemi jembiba yimtenren tensa indang onük benoka lemsatep.
Telok sasep nungi aser tema nungi telemsa adokdaktsütsü atema inyakba mapa NSCN-i meteta lir, anungji tsükchir shinga nema Naga nunger meratadaktsütsü aser melemsadaktsütsü ta tanü senden nung telemetba agi.
Nisung kari Naga nunger ratadaktsütsü merangaka, Naga nunger pei litsü madak kibur aser tarutsü tia yangertsü atema yimtenren temeten lir ta asüba tangatetba nung NSCN noktaka lir. Onoki Indo-Naga yimten tebilemtsü timi latettsü atema ochishia noktaktsü, ta MIP sangdong nung shia lir.
NSCN-i August 3, 2015 Framework Agreement nung ammeta lir aser Indo-Naga yimten tebilemtsü latettsü atema inyaktsü. Kechi arudir aruala NSCN-i Naga linük telemtetba nung noktaktsü, ta MIP-isa metetdaktsü.