Naga mersü & konger tsünüba training agi

Dimapur, July 7 (TYO): Horticulture Department-i Jangpetkong Kaketshir Mungdang (JKM) den yaritepa July 6 & 7, 2017 anogotem Naga Mircha & Mushroom cultivation indang training ka ayongzüka agi.
Iba sentong nung shisalen sayurji Senti Longchar (DK), Horticulture Officer, Nagaland liasü.
Training mapang technical session nung Senti Longchar-i ‘kitchen gardening’ indang onüktem metetdaktsü.
Mokokchung district nung Naga mircha kangabo machir aser iba jagi iba mersü tsünüba ajanga district sasep nung senotsü balaka marutsü akok. Saka, state adena orr shishilembatsü atemabo iba mersü tsünütsü akok, ta pai ashi.
Training anogo tanabuba nung ‘oyster mushroom’ indang jembidang, Senti-i ashiba agi, iba konger ya kanga kara tsünütsü kanga tezüpa aser sen balaka meindoker.
Iba mapang State Horticulture Nursery, Dimapur nungi Longer Walling-i ‘oyster mushroom’ tsünüba indang sayua liasü.
EAC Alongkima Longnyei-ia training nung adenertem dang tsünüsenbong balala tsünütettsü aser itemji shishilembatsü atema tayongzükba agütsü.
Training tembangba sentong nung mendenji Women co-ordinator, JKM Kr. Narola liasü aser training nung adener ajak nem kulikaket aser metsütem agüja liasü.