Naga Mothers’ Association-i jangjashitsür

Dimapur, February 5 (TYO) : Kin teloktemi tetsür teloktem Naga Mothers’ Association (NMA) nungi atsüngzüktsü atema tetuyuba agütsüba atema sasa bilemer.
“Sumi Hoho ama kanga dang akhümtsübua aliba telok kati, NMA taolen mali kümogo aser nübortemi parnok dak tamang samaogo ta jembibaji magizüker. NMA-i tetsür temeten atema ken o benokbaji NMA tribe units- Watsu Mungdang, Tenyimia Women Organisation, ENWO aser NWHD temi pusema Joint Action Committee on Women Reservation kübok benokba liasü,” ta NMA sangdong ka nung metetdaktsüogo.
December 12, 2016 nü Naga Hoho, ENPO den aser ano December 19, 2016 nü kin telok balala den sendentem amendang, JACWR-i ‘nomination’ masü saka ‘reservation’ aser democratic election atema noktaker ta shiogo. Ajisüaka, tetsürtemi tensa balala ajuruba sülen tatem nung JACWR-i loktiliba nung yimjung lidaktsütsü atema SLP meyipa agitsü lemtet, ta sangdong nungsa shia lir.
“Nisung kari SLP meyipa agitsü atema petition magütsü ta tang tashi jembiba onoki angazüker. Ajisüaka, Supreme Court nung Civil Appeal aser Writ petition January 30, 2017 nü agütsüogo aser iba copy ji State sorkar nema agütsüogo. Anungji, nisung mashi kati Supreme Court website nung ibaji reprangtsü akok aser onoki telemtetba agir February 1, 2017 nü JACWR loksaogo,” ta NMA-isa sangdong nung metetdaktsüogo.
NMA ya 1984 küm Naga Tetsütem telok kati lokti nung temelenshi bener arutsü atema tentetba lir. Onoki iba alizüng yur tang tashi mapa inyaka arur aser tanga tashi kari tuyuba ajanga NMA loksa aotsü makok. NMA-i tarutsü nunga tetsür temeten aser lokti dak sendakba onüktem atema maneni inyaka aotsü, ta sangdong nungsa shia lir.