Naga & MT 22 buba Classic Cup quarterfinal tongogo

Kohima, November 18 (TYO): Naga Football Club (FC) aser MT Youth Club, New Reserve telok nati par asaya koka, tang Kohima nung tasayadak 22 buba Classic Cup football asayamong quarterfinal asayatsü jenjang tanü, Hokolbar nü ajangzükogo.
Tanü mezüngbuba asaya nung Naga teloki goal 3-1 agi Intimidators telok madak takok ngua liasü.
Thejaseto-i asaya tenzüker mezüngbuba minute nung goal agüja, par Naga telok temaba jenjang nung ajungkettsü.
Ajisüaka, Intimidator asayar, Senenlo-i asaya mezüngbuba shilem tembangtsü minute 1 shi anünga alidang goal-ji meyipja, par telok anaprongla kasa jenjang kümdaktsü.
Tesülen, asaya tanabuba shilem nung, asaya tenzüker minute 37 buba nung Nyithung-i goal 1 agüja, par telok goal 2-1 agi maneni temaba jenjang ngudaktsüba sülen Senelo-i minute 43 buba nung 4 buba aser takokba goal agüja, par Naga telok quarterfinal-i anir ai.
MT telokia goal 2-0 agi FC Royals telok madak tanabuba asaya koka asaya.
Tanü asaya tenzüker minute 15 buba nung Kevisato-i par MT telok asoshi 1 buba goal agütsüba sülen Lone Kiso-i asaya tanabuba shilem tenzüker minute 2 buba nung 2 buba aser takokba goal agüja, par telok nem takok ngudaktsü.
November 19 nü asaya yamai alitsü:
1. Kuki United FC vs Yhome FC @ 1:00 pm
2. Renegades vs Street Hawks’ FC @ 2:30 pm