‘Naga News’ ta ser smartphone app ka sayaogo

Kohima, June 22, 2016: Bodhbarnü Kohima nung Information & Public Relations (IPR) Director, Pausui Zeliang-i Naga News application sayatsüdang agiba noksa angur.

Dimapur, Juen 22 (TYO) : Nagaland nung Department of Information & Public Relations-i Mongulbarnü ‘Naga News’ ta ser parnok indang smartphone application ka sayaogo.
Iba sentong ya Director indang office chamber nung agi aser Director, IPR, Pausui Zeliang-i ketdangsertem aser media nisungtem lia application sayatsü.
Sentong nung Deputy Director, IPR, Asangla Imsong-i o tatsüka jembidang, “tanü asen taküm nung Information & Communication Technology ajanga temelenshi aika bener arutsür aser electronic media, Information & Communication Technology temi broadcast industry khenyongi balaka melenshiogo” ta ashi.
Department of IPR-i technology aser communications nung nüngdakba tongtsütsü atema meranger. Naga News ya anogoshi adokba news bulletin ka lir aser 1972 küm nungi Department-i iba ya adoker. Naga News ajanga sorkar indang maparen, inyakyim aser terenlok mapatem dak rangloker osangtem prokshir, ta Asangla-isa ashi.
‘Naga News’ indang Smart Phone Application sayaba ajanga tang nungi nisungtemi smart phones ajanga osangtem metettsü akok. Iba app ya Google Play Store nungi angati download sütettsü. Tanga atemabo iba app ya android phone nung dang amshitsü akok saka department-i iOS aser tanga platform tem atema yanglutsü, ta laisa shisem.
Laisa, IPR Director, Pausui Zeliang aser Additional Director, Limawati na dang iba mapatong ketdangsüa inyakba aser yariba atema pelaba metetdaktsü.
Deputy Director, IPR, Asangla-isa Ben Imchen aser Elysium Enterprise nungi par teloki mapang tatsüka tsüngda iba mapatong takok ngua inyakba atema pelaba shisem.