Naga Nüjiso

– M. Meren, Ex.Pastor Ungma.

India Nüchiso mangudang India lima ya tesem tesem nung chuba balalai pei yimli yanglur yimsü süa aru, iba mapang ka nungji tasü tait, pei kin meimba Indiatsür ka Rani Lakshimi Bai Lai yimsü süa liasü, iba mapang nungji British nungeri alima yimli ajak amokbanga yimsü süa aliba mapang liasü, saka Indiatsürlai British yimli küpoki maitsü, parnok tsüngdang mapudaktsü, par Lar makümtsü ta ser Lai pei India yimliji angateta British nunger den meranga rara aru, aser ano tesülen lai tashi tait mitsa ka yanglur iba nungji atsüker lai tashi ajak agi rara aru, saka par India nunger rong nung pei kin memeyimba nisung, rongsen meimba nisung, pei kin senyong yoka achiba nisung adok aser parnok jagi British nungerji anir pei nüpurtem denji rara, saka Chubatsürlai Kor nung mener Lasang bener tsükchir denji tesüngmangtsü tasü ita rara, anungji British nungeri Laji majet anungji British nungertemi Chubatsürla kupok tongtiba Maratba sebay tanishisang sen agi mesüzük aser pai parnok tashi tait Mitsa gateji lapoka yutsü anungji Süngkhum gate lapoka akaba nungjagi British Sebaytemji mirijang aika nungoka tua Mitsaji atsüngtet aser Chubatsürlajia tepset ta yamaji atalok.
Tanü Naga lima tia asadanga aru nung Indiatsürla Rani shibai pei kin Nüchiso asoshi pei taküm agi tenlaa British nunger den rara nokdang saka pei kin nungi British nunger sen meshia semer, British nunger sobutsü sobur pei kin ashiokja, pei kin British nunger lar kümdakja pei kin ashiotsü, ibaji mesüka Naga Nüchiso asoshi Naga nunger ajungai molunga Wokha Town nung Naga Elders meeting tulu 1946 March nung sentepba NNC tenung jatet aser iba nungji Naga nunger ajak Zep ta tzüa masen longjemer tashi ajak agi Naga Nüchiso asoshi India den matsüngshie jembia aser rara aru.
Saka India P.M.Nehrui Naga nungerji azüoktsü asoshi Assam Police nem tashi tulu agütsür Naga Hillsi nungteta atua Naga nüpurtemji tesüngmangtsü rishikangshitsü tenzük, aser parnoki majet nung joko India Army jaket aser yimdaklirtem aser telong nung kin tenzükertem atsüka alirtem putena tebang agi rasaa ashitsü makoktsüsa rishikangshimeso, anungji Naga nüpur teküp-tesü agi mati nung joko Naga nungeria mang ayangtsü lemtet.Aser tamasa Naga Safe Guard tenzüka India Army den pei kin asoshi rara aru. Aser Nation mapa jungjunga kümteta bener aotsü asoshi Naga nunger ajaki molunga FEDERAL GOVERNMENTji 1956 March 22 nung lateta joko Naga nungerji Government ka kümteta yur Naga nüchiso asoshi India den jembia rara aru.
Saka India nungeri sen aser yi jenti bener atua Naga nunger aika mesüzüker parnokji India sen yangku sünga semtsür, India Army sobutsü sobutsür India Army anir yimdak aluyimer ki ajak lapoka,parnoki majinüba nisung anizuka, yipden nungi mejanga akaba mesakjunge atsüzüka zükmesoa tetsüng agi metsüa kima atongdangbo joko ola maka anizükle ta aser anir or tesem kar nung kaseta yutsüli ta benshimeso. Aser kinungbor anir or kelen kinungtsür dak Army asem pezü tua tamajung benshi aser aiür alirtem tsüraburi ngua rishikangshi.
Aser kidang nungi kwi puzüaka Army camp-i bener atu parnokji tebang agi rasaa ashitsü makok rishikangshi, oda parnokji tetsüng nung lisü agi sendaker langkushishi sangzüa yur pa indangji mi apur mokozü agi tangu sashi majung kangshi, tenük nung mersü semoktsü, pusta nung seper longren nung mekadaktsü, temeyong ter prongla nung ajem temezüng angema tokloktsür longsang yadaktsü, tetsüng tesa agi metsüseta südaktsu, pei asütsü asoshi ali ongken tudaktsür idakji menadaktsür kaseta yutsü.Aji oda rasa meshitetba rishikangshi ajuruogo. Yamaji kangshiyongbo Naga nungeri Naga Nüchiso asoshi masetshie meranga inyaka aru, iba mapang nung Naga nüpur yimdaklir aser telong nung alirtem mezüngdangtettsüsa tepsetdaktsüogo.
Naga nunger mirijangsa mirijang agi pei zü agi tenlaba Nüchisoji pei pei ajung apia, pei ulutsü tang bilema tamagitsü telemtetba ishikayong shiri India nunger dang yoka chidir tarutsü putui parji atakatemtsü.
Nagaland Chief Minister Rio-I taoba N.P.F party yanglua tenzükdang pai ashi nenoki dang ni shimtetra tamasa ni Naga yimden latettsü ta pai nangzük, saka kechi aküm? Saka Naga nunger dang olem shia pabo C.M. menden ajangzük, saka Naga nungerbo tang tashi lenmang jitemer kazüteper.
Ano tang General Election 13buba ya Election ji magie khen atasang saka India den kechi yimden telemtetba agitsü wadangbang nung lir aji tama kümtetdi ta ajaklen nungi anung, saka temaba menden aginertemi tamasa Election agia Government yanglur külen mezüngbuba nung India den Naga yimden latettsü ta menangzük no? saka tang kechi ajurur? Taoba Health & Family welfare Minister, Imkong L. Imchen-i April 10 nung sangdongba nung ashiba agi, Naga yimten latettsü asoshi o lemtep kanga takok ngua oyaa liasü, saka Centre nung BJP party-i mapa songtema yutsüogo ta sangdongba angur, aji shidak südito? Nagaland nung BJP Sorkar latet nung dang iba sülenji dang Naga yimten latet jembitsü süra ajibo Nagaland Christian State atemabo tebilemtsü kanga tulu asütsü masü no? Naga nunger Khristan ajak BJP aküm nung dang aser RSS aküm nung dang Naga Nüchiso asoshi teimla ali no? Ibaji atalokja Minister of Home Affairs, Kiren Rijijui April 8 prokshiba nung NSCN(IM)-i pei sasa yimsü asütsü akhangba aser tanga onük tongtibang aika agienogo ta shia lir, sürabang Naga yimten Nüchisoji general Election 13 buba sülen mezüngbuba teinyaktsü aji asütsü süra telangzüba kechi lir? Tsürabur otsü nung Nokdensang itaji teka agi amshia kanga dang anasa liasü saka yimdong kazürtemi atsüngtong agi toshia toshia talangba talangba oadok ta jembia aru anungji tangbo itaji nisungi matongtsüsa anüng nung dang asenoki angur, au südi? aser India nungerji akhidang nungi tekelak kin lir, anungji tamangtsü kangabo maliakoti.
Naga nungeri pei Nüchiso atema nisung Merirjangsa merirjang India nunger nem tepsetdaktsübaji kechi atema pei taküm agütsü? kenübo item Azü jagi ola adoktsü, idangji chuba menden nung mena alirtem asoshia kanga ropozütsüako. Anungji nangzükba ama mapa agi inyaktsüla.
Tanü Nagaland State menden tajung nung mena alirtemi Naga nunger nütsüng nüburtem kechi koma timtem ajurur iba State ya angu aji teraka meteta mali, saka tongtibangsa yimdaklirtem ajungai pei terongtong tendaker India nunger nem ajemshidaktsüba aremba ajanga tanü State ya ngua lir, saka tanü temaba menden nung mena alirtemji item semchirtem dang lir, anungji nenoki koda okronger iba jenjang angu aji meteta mali, ibaji metetertembo ana-asemka dang alitsü südi. Saka tanü temaba menden nung mener tou-moakertem iba temoatsüji tsürabur tenem nung kongzü punger kobang tsünger aser langtem temer pei kidang kinüngtsür den yipden ka nung memejangdang, chi külemi mechiyongdang, Keyi-pongzü metsübu, mojing tesashi metsübu saka India Army dang atsükshishia arem min tzütah nung mejanga senzüba ajanga tanü temaba menden nung alirtem ajangzüker, aser nenok nem ajangzüktsürtembo ajak tipu lima nung dang sendena lir, aser parnoki inyakba wadang matem temdaka yutsübatemjia tanü lanurtemi koma inyaker ta Tipu lima nungi penzüa alitsü südi. Aser asen tsürabur Azü agi tenlartem mirijangsa jendi agi onoki onok Azü agi Naga lima ayong kema yimdakja onoki tenlaogo saka onoki temdaka yutsüba wadang tila ka inyaktsü asoshi telok paikati lemsar ATEPZüNG nung rarateper, asenok raratepba milongsang ajemshirtemji shirnok? ibaji obala India ji masü no? pai kodanga sütembangji mechioktsü nung koda? Akinüla molungjang jara tapok nungi angu ama obala tebilembaji tangu dang nung koda? Pai asenok telok ajakji longjemang aser idangji ni sütembangji chioktsü ta ashibaji asenokji kodanga melongjemtsüsa ta obala jagi meteta lir. Sürabang Naga sensotem koda bilemer? Asenok Naga kin telok pongu-terok küma meloksadang asenoki bushiba Naga nunger temeden Nüchisoji State ya masü, Naga nüburtemi State asoshibo taküm metenla, State asoshi Azü magütsü saka Naga nüchiso asoshi tenlaogo. Ano tanü asenoki asen jakdang penzüba Framework ji kechi koda zülua ali aji aseni memetet, iba jagi Naga nunger temolung asütsü asü masü ajia memetet, iba jagia Naga nunger longjemer bushiba nükjidongji atongtsü asü matongtsü ajia memetet, obala nunger putu nung Naga nunger ta asüba tashibo ka küma longjemer asentzü sena Naga nüchiso bushidang India-i yadanga amshia ata liang ta ser agütsüba State nung jangratema alirji joko iba jagi temolung sür tsünga-mayim, sümi mai alitsüa akok, saka tanü tia nung Naga nüburtembo ongsük ayir, yimdaklirtembo aiatai tia nung liteper, Centre nungi yimdaklir atema yokba metemji matonger, len tom nung rosepa adoker, sensaker atema, mokokminer atema yokba tenük ajak rangpoka repranga atayonga kecha tsüngsüa maka. Ano shirnok Naga nüchiso asoshi pei kibong, pei adianu ajak toktsür AREMI senoka ir Nüchisoji atateper saka Nokdensang ita ama toatoa oa adoker anungji teimla anasa mali saka arishibo oma adoker aser tachitsübo maka nung tesem tesem nung saroa jajadang timtem jenti ataloker ta yamaji aiben tebilemtsü khuret ajurur. Anungji Election wadangbang nung nokdaker nüburtem dang Naga yimden tama inyaktsü ta nangzükba wadangji azünga ali mapa ka dangbo mekümdaktsütsüla aser Naga nüburtem ojang mesüshitsüla.
Ano Aor Aotsürtem dang jurila o ka meshie meliner. Naga yimdenji latetaka ao nunga asen Aortema YAKPANG asütsüsa karbo lir ma? Tangar kin NOKLEPTSü dangbo masütsüsa lanu-asensortem rong nung karbo adoktsüla masü no? Ibaji kanga tebilemtsü asütsü ta nibo bilemer, tsürabur mapangbo Aotsür Aortem pi Nokleptsü ser kodanga maruani? Tanübo koda? Sen agi aliba mendenji masü saka Naga Nüchiso meimba, Tsüngremi agütsüba shisarajemji telong nungi tera yanger meiba nüngdaker.
Nagaland State kemer Aortemi küm 20 jungnüa State anir aruogo, Cabinet menden nunga aika mena aruogo saka Ao lima nung Department tajung kata amenoka maka, Secretarial branch kata bener marutet, Industry tajung kata bener marutet, Pulp and paper Mill Company ka amenok nung anena adok, University kaji Lumami nung amenokdaktsü, Agri College kaji Dimapuri bener alu, Science College Kohimai bener ao, High Court Kohima nung amenok. India Army Imliaküm Chuchuyimpang, pai pei taküm agi tenla agüja Kargil War nung taküm bendanga agütsür tsükchir den rara takok tulu angubayong pa nem aikati mungutetba konang tetushi MAHA VIR CHAKRA agütsü. Iba takok konang tetushi nüngtem nung Centre-i SAINIK SCHOOL ka agütsü nung ibajibo Aolima Ao area nung amenoktsü tim ser nung pi nem rakzüka odaktsür PUNGLWA nung amenokdaktsü, iba Sainik Schooljibo Aor azü agi alizükba masü no? Ano tang Dr.T.Ao Memorial ajia Kohima nungang amenokdi ta? Dr.T.Ao Memorialji Ao lima nung dalang masü no? College tajung ajunga Dimapur & Kohima nung lapoker, Hospital tajung ajunga Dimapur & Kohima nung lapoker, Doctor tajung ajunga Dimapur & Kohima-i belener oadoker, ajungben tashidak tulu adoka Mokokchung Hospital-i bener atu nung Jorhat, Kohima & Dimapur-i bener oang ta ashir aser sen aposhilua bener apuso nung lendang timba süa adoker ta iba tiaji Aor Aotsüri tajurudak lir.
State benjung koba HORN BILL FESTIVAL lir ajia Kohima nungang amenok, Ao limabo Jangjang luyang terep süngtong nung aradaka aka amato Aolimabo terep dang kümogo, kabatemang Dimapur aser Kohima nung amenokba jagi Aortem anisüngzüktsü no? Reprangang, Aolima nung Historical places kata maka, Parks tajung kata yangluteta maka, oda Tourist Attraction kecha mali, Educational Institutes tajung kata maka, State ngur küm paikati süia aruaka Aortembo pi Nokleptsü sür dang lia aruogo, anungji Aor Aotsürtem saksalemtsüla. Asen jakdang repranga ataba Naga Nüchisojia tanü nungi sangdonger ta osang agütsü nung idangjia Aortembo tesülen dang asütsü nükladang angur. Ao lima aiatai ajurutsü, tarutsü lanu putui kübo kübou nungera kechi ajia ali? ta asenok atakatemtsü mapang arutsü, Temaba menden nung mena alirtema puri Supangsang dang ashiba ama, Kabur na ozü ya tamachitsüla temeja, anungji yaa wao, yaa wao ta tajung ajak endoktsür pa nem Ali Ozü tila ka shimteta agütsüba ama asen Aortem Ali ozü tilaka agi tenük sünger telima no? Nabo temaba menden nung amenerji na achitsübo ngukümsa saka Aotsür Aortemji koda, aser alima tazüngla ya angur südi? Naga Nüchiso, Naga nüchiso ta jembiyongbo tangari Ali Ozü tang tila ka agütsüra iba jagi Aor Aotsür ajungketdima? Tsürabur mapangbo Aotsür Aortem tangar Nokleptsü kümer senzürbo mali asüago, Aotsür Aortemji mezüng nungi Naga nunger lenir asüadi.