Naga nunger aliba litsü ajak ka akümtsüla

Kohima, May 31 (TYO): Nationalist Socialist Council of Nagalim (NSCN-IM) nung Angami Region-i tanü Naga nunger pei sasa ketdangsüa aotsüba aser Naga nunger aliba tesem ajak ka akümtsü takhangba agütsüba nung masetshii noktaktsü telemtetba agi.
Hokolbarnü The Hut nung “Retrospection of Naga integration” onük nung ajemdaker NSCN(IM) Angami region lennirtem shisatokden alidang iba telemtetba agi.
“Yimtenren mapa ya Naga nunger aliba tesem ajak nung Naga nungertem atema lir” ta NSCN(IM) Kilonser (minister) aser collective leadership lennir K K Angami-i ashi.
Iba mapa nung Angami nunger ya tetenzükertem lir aser Naga yimten telok kari Nagaland nung aliba Naga nunger atema yimten latettsü jembiba ya NSCN(IM) indang Angami region-i magizüker. Onoki Naga nunger aliba tesem ajak ka küma longjemtsüba takhangba nungi masetshir, ta paisa metetdaktsü.
Taoba Prime Minister Jawaharlal Nehru-i India nung tribal areas ya India mesüra Burma nung shilem masü, mesüra Indian state masü mesüra bendanger shinga kübok mali” ta ashi, ta NSCN(IM) lennir ‘lt. col. (retd)’ Victor Angami-ia ashi.
Taoba India lennirtemi Naga nunger temetentem anema menokdak aser Naga nungertemia asenok India nunger masü ta shiyonga arur. NSCN(IM)-i 16-Point Agreement magizüker aser iba tenangzükba ya tang yimjung olemtep nung kecha shilem mali, ta Victor-isa metetdaktsü.
“Onoki kodang Naga nunger temeten, wako aser temzüng akhangba meyipa magitsü” ta Victor-isa ashi.
Iba sentong nung shisalen sayurji Angami Public Organisation nung taoba president Mhiesiezokho Zinyii liasü aser pai ashiba agi “Naga nunger putiotsü aser maitsü khenyongi balaka.”
“British nunger South East Asia madak yimsü masüdangbo Naga nunger ya shingai memadoktet mesüra tashi mesüra linük shinga kübok maliasü. Naga nungeri shinga linük nem-a litsü tila ka danga magütsü” ta Mhiesiezokho-isa ashi.
“Urra Uvie” (Ozü linük, ozü meyong) ta asüba tangatetba ya Naga nüjiso bushiba nung tera yanga lir, ta paisa shisem.
British nunger Asia-i marudang yongi Naga nunger pei sasa yimsü süa aru. South Asia nung yimtenren melenshiba tia ngua, iba mapang Naga yimten telok ka dang aliba Naga National Council (NNC)-i alima dang Naga litsü, Naga maitsü aser Naga nunger pei sasa yimsü süa aliba osang metetdaktsü. NNC-i August 14, 1947 nü alima dang Naga Independence osang sangoktsü, ta Mhiesiezokho-isa shisem.
Maneni, Naga nunger India kübok masü ta sayutsü atema May 16, 1951 nü Naga Plebiscite agi. Iba ya otsüsütsü aketba inyakyim ka liasü aser tanü putu nung Naga nunger yimten tangatetba aliba dang sayu, ta paisa metetdaktsü.
Puitotsü nung Naga nungeri inyaka aruba nung ‘insider’ mesüra ‘outsider’ ta kodang bendanga mamshi. Nagaland mesüra Assam mesüra Manipur, mesüra Arunachal Pradesh mesüra Burma (Myanmar) nung alir ajakji Naga nunger lir, ta paisa shisem.