Naga nunger Arrla 371 (A) nung dang longjema lir: Dr. Imtiwapang

Mokokchung, May 05 (TYO): Brihostibarnü NLA Speaker, Dr ImtiwapangAier-i, Naga nunger adianutem Arrla 371 (A) nung dang longjema lir, ta metetdaktsü.
Dr. Imtiwapang-i akhümket menden, NLA Speaker ajangzüktetba nüngtem nung pa nem tetushi agütsüba sentong ka Mokokchung district kübok Kobulong jila nung ayongba sentong nung jembidang pai iba o ya metetdaktsü.
Paisa, 1950’s mapang linük nüjiso bushidang asen tsüraburtem kanga longjema liasü, aser iba telongjemji ajanga tangari (India) asen lokti tiyongtsü maittet, ta ashi.
Iba dak sendakba nung tesasaba olen ka lemsadang pai, tanübo Naga nunger adianutem rongnung telemsa kanga adokba ajanga tangartemi parnok tebilemba inyakteter, ta ashi.
Paisa, “Naga nunger rongnung telongjem maliba ajanga tangari parnok sünütsü asür,” ta ashi.
Paisa, tanü India sorkar aser state tsüngda ali aser ali nungi adokba rongsen raktepba onüktem lir ta shia pai, “India sorkari, alijibo nenok meyong saka ali rongsemtemjibo külem meyong ta ashir. Iba nungji tanga onük kecha mali, saka ibaji asenok totzü aser Natural gas ta shinerba lir,” ta shisem
Iba dak sendakba nung pai, Naga nungeri parnok meyong ali dang aginer asü ali rongsentemjia aginer? ta asüngdang.
“Item mangatettep bentettsü atema state sorkar dak dang metalokba agi kecha masütsü, saka iba rara akoktsü atema nüburtemi longjemer shilem agitsü nüngdak,” ta paisa shisem.
Iba sentong nung 23 Impur Constituency kübok village councils, adhoc town committees aser party nung inyakertema aden. Ano village councils, adhoc town committees, 23 Impur A/C NPF aser NPF Mokokchung Division shia nungi züngsemtemia jembia liasü.