Naga nunger asoshi tenüngdaktiba

Election arurji ano tanga yimten telok ajaki Naga nunger asoshi tajung inyaktsütsü aika metetdakja arudagi. Item rongnungji Naga yimten tebilemtsü latettsü atema nangzükba ka aser terenlok mapatem asoshi senotsü peria lemzüktsütsü ta nangzükba ka ta tenangzükba onüktembo tejen saka tangang tasen kümshia nangzüker ama nangzüktepdagi. Inyaktsütsü asoshi nangzüker asünungji temesüshi mesüra tiyazü tejembi ta ashitsülaa masü aser makoktsübo tenangzük ta ashia majung ta nübortemi odang angar yutsür. Ano, election shia tenangzükbatem kasa dang saka mapa akümbabo kata mali ta asüba agi, Nagaland nungbo Naga nunger aikati election sendeni maor, anungji ka party, ka party ta mali election senden molungsor. Ibaji tezüdangtsüka lir, kechiyong, shitakbabo, nübortemi election-i aier candidate-temi koma aser kechi jembir ta angadangnüa election senden nungji adentsüla. Ajisüaka, yimten telok aser parnoki yokba candidate-tem dak temulung malemba agi election senden nung adentsü mejangrar südi. Ano, tezüdangtsükaji, Nagaland nungbo nübortem election senden nung adentsü mejangrabaji dang masü saka vote agütsüba anogo nunga nisung aikati vote agütsüia maor, anungji ochimashi mapa inyaktsü kecha arendaka malirtemi marurtem ajak indang vote enoktsür. Aji oda, nisungbo teimbaka vote enoktsüi mao saka vote-bo ajak enoktsü ta asüba state-ji Nagaland lir. Iba amai nübortem yimten nung shilem shitak agitsü mejangrai kümdaktsübaji yimten lenirtemi nübortemi temulung lemtettsüsa yimten shitak anir maoba ajanga lir. Ashiko, tang election nung yaa nisung aikati shir adokner adokang ta ser vote enoktsüi maotsüa akok. Ajisüaka, asen lima raksabaji vote enoktsürtemi nisung tai nem enoktsüba agi masü saka asenok teimbakati vote enoktsüi maoba ajanga raksar. Nisung ajaki kodang pei vote ya senti aser jenjang aketba temeten ta angatetdir, idangjibo sensak tia nung aliyonga vote mayoktsü aser tsünglua aruyonga aser anü apuyonga pei vote peisasa enoktsü asoshi polling station bushia aotsü. Tanü asen lima nung nüngdak tulutiba ana lir, kaji asenok ochishia alitsü merangertem asütsüla aser ano kaji yimten nung asenoki pei temeten meteta timtemakasa shilem agitsüla. Atangji, alima nung alir asünungji kotak tenyar amatobo meshimeshia melitettsü, iba jagiang Lashiba nung kangabo meshia alitsü temerang ta ashir asütsü. Ajisüaka, teti asenokji ochishia alitsü merangertem asütsüla. Ochishia melitetyonga, ochishia alitsü merangba agi nübortem tenüng amshia sen agizüka mechitsütsü, mapa meinyak ser sen agizüka magitsü aser nübortem sen agi nübortem den masayatsü. Ochishia alitsü merangba agi pei lima khen nung topur junga yanglur alitsü aser nübortem aika tebok mesüngteti aliba jenjang nungi pei perir külenang tangar yaritettsüsa tashi itta kümer alitsü. Shitakbabo ochimashiba agi Naga yimten tebilemtsü ya tatembang kati arua mejembitetter aser ochimashiba ajanga asen lima agi asen nümamedangtettsüsa alir. Ochimashiba agi kar takar akümdang aika sensaker kümdaktsür. Iba kasaji ochimashiba ajanga karbo bendanglen kaketreju tajung nung azüngdang, aika pei lima nung aliba kaketrejutem nunga mezüngtettsüsa timatemer. Ochimashiba agi, government mapa inyakerbo aika saka government-i inyaktetba kecha maka ta lialia state government-i mapa inyakertem nem ita sena magütsütet küma aotsü ana nung lir. Ochimashi ajanga nübortemi yimten telok ka daka temulung melemtettsüsa kümogo. Ashiko, iba jagi vote ayoker asütsü. Joko, tang yabo Nagaland tasen küma tajungba yanglutsü asoshi nübor ajaki timtem agia aser ayatzüra arema yimten nung nüngsen agia shilem agitsüla. Ashiko, asenoki vote enoktsüi maobaji karbo mapang talangka nokdaka mekazünüba agi asütsüa akok . Ajisüaka, asen asoshi jembitsütsü aser inyaktsütsü atema yimsüsür ka shimba maparen  nung asenoka tenla kabosa agütsütsüla aser iba tenlaji, vote enoktsütsü asoshi timtem arema tarensena nokdaker pei mapang aru yongyaa atabaji asütsü.