Naga nunger dak azükba

Naga nunger yimten otsü ya nisung khasetba aser nisung dak mapayui azükba agi sünga lir. Aji oda, Naga yimten nüchiso asoshi Naga nungertemi ola adokba manganüi India sepaitemi Naga nungertem dak azükba zübo ano manepi lia Naga nungertemi Naga nungertem dak azükba otsü agi Naga nunger mulungjang kanga yirua lir. Naga nunger ya khen bilemtsübo shisataka amai, kechiyong parnoki pei yimten temeten asoshi nokdaker, saka ano külenbo Naga nungertem yasa matumalemba amai, kechiyong parnoki pei adianu taküma mapayu khaseter aser azüker. Aji oda,  anogo ishika jakdang Dimapur nung linük tenzüker telok kati Naga nunger dokan nung amener ka dak azükba otsüji Naga nunger ajak asoshi tejashitsüka lir. Asenoki jungjunga bilemdangra, Naga nungeri Naga nunger dak azükbaji India nungeri Naga nunger dak azükba dang nungi maksü tuluba lir. Ibaji India nunger tsüngdang taaktsüka. Iba jagi shinga majangzüker. Naga nungersa süaka mashi nisung kati mashi ka dak azük mesüra raratepbajibo alima yimya dang asütsüa akok, saka Naga nunger linük tenzükertemi Naga nunger ka dak azükbajibo India tsüngdang asenok ajak maaksü lir. Iba jagi India tsüngdang Naga nunger linük tenzükertem alur ta bilemtsüla. Tanü Naga nunger kibong shia nung tatalokba otsü asüngdangtepa odangra, Naga yimten nüchiso asoshi nokdakba ajanga India sepaitemi mezükdangba mesüra VG-temi mezükdangba mesüra linük tenzükertemi mezükdangba kibong aikabo malitsü. Naga nunger kibong shia nung item telok asem rongnung kati mesüra katibosa azükba  mesüra merenshiba tatalokba alitsü. Atangji, India sepaitemibo azükbajibo tsükchri azüker saka Naga nunger linük tenzükertemi Naga nungertem dak azükbajibo pei adianu aser pei nübortem dak azüker, anungji alima tsüngdang taaktsüka lir. Tanü Naga lima nung Naga nunger linük tenzükertemi Naga nunger dak azükbaji alimelen magütsüba ajanga atalokba lir. Aji oda, alimelen magütsüba temerenshiji tazükbabo masütsüla. Azüktsü melena linük tenzükertem jagi nübortemi kechiba parnok asoshi nüchiso bushitsürtem nem alimelen magütsüner ta bilemdangtsüla tuluka lir. Atangji, Naga yimten nüchiso bushiba mapaji nübortemi alimelen magütsüra kechi agi inyaktsü ? Anungji, nübortemi pei tata shilembo mulungsua agütsütsüla. Ajisüaka, tanü Naga nungertemi Naga nunger yimten nüchiso bushir teloktem nem alimelen mesüra saru magütsünüba agi masü saka telok aika asüba agi magütsütetter. Jungjunga bilemdangra, business inyaker nisung ka mesüra contractor ka mesüra sorkar mapa nung inyaker kati Naga nunger linük tenzüker telok paika nem ya kodaser saru agütsütettsü ? Aji oda, agütsünüyonga koba telok nem agütsür, koba telok nem mgütsütsü ? Iba shisabolu aser tetsübu agi sünger tanü Naga lima nung sensosangertem mapa inyaker. Tapu aika jembiyonga Nagaland tiaji aji lir. Aji oda, tanü Nagaland majungba ya, merenlokba ya aser mesüngjemtetba ya yimten temeten asoshi nokdaker telok inra kümer saru inba ajanga lir. Iba amaisa ora, ano Naga nunger yimten nüchiso bushir telok ya ano teimba kümadoktsü. Idangjibo, nübortem dangbo yimten nüchiso bushir teimba asütsü. Tanü Nagaland asoshi tebilemtsüji aji lir. Tanübo dokan nung amener senso tajung ka dak linük tenzüker telok kati azükba agi tejashi marem külem shishilembaba mapa nung inyakertemi longjemer Dimapur anogo tesadang ka mokdangogo aser nisung dak azükerji aputsü aser merenshitsü asoshi takangba agüja lir. Aji tim, anungji telong nung alir a sang, tema nung alir-a sang tashiyim amshiba nisungbajibo metongshitsütsüla. Ajisüaka, iba kisüng jagi tanü asenoki ajuruba timtim ya manentsü. Ibai Delhi nung oa khen jembir aruba agia majungtsü. Ibai asenok ajak asoshi shisabolutsü tulu lir. Tanübo Naga yimten tebilemtsü aliba agi, ashiko, karbo tajangzükang ngua alitsüa akok, saka aji alima tatem masü. Tanü tajangzük ama angubaji tajangzük tajung masü saka timtem toushi aser maksü nung asen taküm, asen kibong aser asen kin tembangtsü ajangzüker asütsü !