Naga nunger dangi

– T.Lima Tzüwar, Ungma Impang, Artang Ward.

Temeim Naga nunger amangpaburtem, kibong ka libalirotsü aser chiyonga ajemtsü aser subusolemtsü ajakji rongsen makai alitsü makok, saka kanga tali tapong mebushitsüla. Rongsen madak kiburji Tsüngrem asünung Tsüngremji mezüngbuba aser Pa tsübutsüla, Pa temeim medenibo aseni kecha inyaktsü makok, kolenia aotsü aser arutsü makok. Pai asenok aoba aruba ajak nung len anir aser moatsür. Pai asenoki kechi inyaker aser kechi jembir ajakji repranga atar, anungji pa akhüm tsübutsüla.
Meimchir taküm ka tanü lir asüng malitsüba lima nung alir asünung nisung shiai kanga jung bilemdangra, asenoki kodanga masütsü amai kanga asüküma ngangsangatema bilema liaka iba lima ya toktsür aotsü, shingaia nibo kodanga masütsü oda yamai sa alitsü ta jembitsü makok. Iba lima yabo jata puta lima aser temenen lima. Anungji rongsen tali tapong arishia rongsen nükshidang aser arishidang tangar kar tai pua aser taküm lendongi yia taküm tembangatoktsü menua mali aser kodang kechi lendong timtem ajurutsüar nai aser ni memetet.
Temeim asen Naga lima nung aliba amangbaburtem, tangar ashioktsüba arishiba tai apuba, tenük meremba, ngangsangatem asüküm, nüktapangta, auyaba, nisung tepsetba rakzük raktemba atalatsüba ano aika lir, item ajakji asen temeli aser asen mulungjang ajanga adoker aser item ajakji mojing sentong lir. Mojingji asen-i ngua asen dangi arua matidangtsü, saka asen mulungjangi yir atidanger aser mesüzüker, anungji asen mulungjang teti merükteta alitsüla aser asen mulungjang nung teti Tsüngrem bilema alitsüla. Aji süra mojingi asen matidangtsü aser mashioktsütsü.
Temeim amangbapurtem asen Naga lima asoshi maneni sarasadema alitsü kanga mepishir asenibo Pa asoshi tajung meinyak, saka Paibo asenok meimer.