Naga nunger dangi

–  T. Lima Tsüwar, Ungma Impang, Artang ward.

Temeim asen Ao kin aser Naga nunger amangbaburtem, April 1 aonung pungmang nung tenyar o bendangba arua kü dang yamai ashi, nenok Aotsür Aor aser Naga nunger amangbapurtem saksalema alitsü mapang tongogo. Naga lima ya Khristan lima tabo jembir, saka ochi mashi külak küpong meputep asüküm aser tepenja agi sünga lir. Iba den tenük merem aliba ajanga kija aser kibong lokti ajak petsaprong adokdaktsür aser alima raksatsür. Item ajakji mojing sentong aser mojingji tanüla dang lir, anungji Nagaland nung aliba amangbapurtem tamasa pei mulungjang yanglushiang. Arogo aser pei kibong aser kija ajaki maneni sarasademang ta ashir.
Nagaland tia makara ano ochi mashi agi sünga aliba telok tentetsü asoshi jembitepdar aser nübu bushidar ta ashi. Anungji Nagaland nung amangbapurtem ajak ochi mulungjang agi Nagaland asoshi sarasadem nung maneni benang ta tenyar o bendangbai asenok Naga nunger amangbapur dang ashi.
Ano April 2 aonunga arua pungmang nung yamai ashi, nenok Aotsür aser Aor amangbapuri anir Nagaland nung aliba Naga nunger amangbapurtem ajak obang ka sür aramesoang aser longjemang, tamang tongpang nung Nagaland tia asoshi aser Nagaland melenshitsü aser yanglushitsü aser Khristan lima shitakba yanglushitsü asoshi ayimdenang ta ashi.
Temeim amangbapurtem, yangi amangbapur ajak den Laishiba nunga yamai ashir, nenok aramesoang aser la anema tongpang nung asenok aramesodi. Ajiang ni na kin rongnung tila kümdaktsüogo, na kanga sensatsütsü nü mulungjang agi na külakokdaktsü, O na long tulu jakmaba nung lir. Azük talang nungshibai ni ali-i lidaktsütsü ta ashir. Nai mongzü ama talangi tuaka aser nü tesep petinu rongnung yangluaka ni na yang nungi anir arutsü ta Kibubai ashir. Ya asenok Aor Aotsür aser Naga nunger amangbapur libaliru aser jembishinü nung kümdanga alitsü atema ashir asünungji asenok ajaki melenshitepba alitsü merangdi arungma.
Akhüm keta mena aliba Minister-tem, nüburtemi nenok dak temulung lemteta alibayong nenok shimtet aser Naga lima yimsüsüba mendeni tur küm 15 buba nung jajar. Saka nenoki Tsüngrem amadok, yimsüsüba mendenji Tsüngrem meyong lir, saka nenoki nübur memeimer, nenoki Tsüngrem akhüm tsübua malir, anungji mekümdangra nenok yimli laotsü menua mali. Anungji ochishia Tsüngrem akhümtsübua alitsüla aser nübur tenzüktsüla. Tejen Lai putu mapang nunga Tsüngrem amadoker pei sünütsü süa yimsü süa alir aser nübur jashidaktsüba yong chuba menden nungi alur arem nung shiruru den tependang makai lidaktsüba shia lir.